1 Kaya mga kapatid, sa pamamagitan ng mga kaawaan ng Diyos ay isinasamo ko sa inyo na iharap ninyo sa Diyos ang inyong mga katawan bilang haing buhay, banal at kalugud-lugod sa Diyos, na siyang inyong makatwirang pagsamba sa Diyos.2 At huwag kayong makiayon sa kapanahunang ito, sa halip ay mabago kayo sa pamamagitan ng pagbabago ng inyong kaisipan upang mapatunayan ninyo kung ano ang mabuti, kalugud-lugod at ganap na kalooban ng Diyos.3 Sapagkat sa pamamagitan ng biyaya na ibinigay sa akin ay sinasabi ko sa bawat isa sa inyo na huwag mag-isip sa kaniyang sarili ng higit pa sa dapat niyang isipin, kundi mag-isip sa wastong pag-iisip ayon sa sukat ng pananampalataya na ibinahagi ng Diyos sa bawat isa.4 Sapagkat kung paanong sa isang katawan ay mayroon tayong maraming bahagi, at ang lahat ng bahagi ay hindi magkakatulad ang gawain,5 gayundin tayo, na bagaman marami, ay isang katawan kay Cristo at ang bawat isa ay kabahagi ng isa't isa.6 Yamang tayo ay mayroong iba't ibang kaloob ayon sa biyaya na ibinigay ng Diyos sa atin: kung paghahayag ng salita ng Diyos, siya ay maghayag ayon sa sukat ng pananampalataya,7 kung paglilingkod, siya ay maglingkod, kung ang isa ay sa pagtuturo, siya ay magturo,8 kung ang isa ay sa pagpapayo, siya ay magpayo, siya na nagbibigay, siya ay magbigay na may kasaganaan, siya na nangunguna, siya ay manguna na may kasigasigan, siya na may kahabagan, siya ay mahabag na may kasiyahan.9 Ang pag-ibig ay dapat walang pagkukunwari. Kapootan ninyo ang masama at manangan kayo sa mabuti.10 Magmahalan kayo sa isa't isa ng may pag-ibig ng magkakapatid, unahing pahalagahan ang isa't isa sa pagpaparangal,11 hindi tamad sa kasigasigan, maningas sa espiritu, naglilingkod sa Panginoon,12 nagagalak sa pag-asa, nagtitiis sa kahirapan, matatag na nagpapatuloy sa pananalangin,13 nagbabahagi sa pangangailangan ng mga banal, at nakalaan sa pagtanggap ng mga dayuhan.14 Pagpalain ninyo sila na nagmamalupit sa inyo. Pagpalain ninyo sila at huwag sumpain.15 Makigalak kayo sa kanila na nagagalak at makiiyak kayo sa kanila na umiiyak.16 Magkaroon kayo ng iisang kaisipan sa isa't isa. Huwag ninyong isipin ang pagmamalaki, sa halip ay makiayon kayo sa mga mapagpakumbaba. Huwag kayong nagmamarunong sa inyong mga sarili.17 Huwag kayong gumanti sa sinuman ng masama sa masama. Isipin muna ninyo ang mabubuting bagay sa harap ng mga tao.18 Kung maaari, yamang ito ay nasa inyo, mamuhay kayong may kapayapaan sa lahat ng mga tao.19 Mga minamahal, huwag ninyong ipaghiganti ang inyong sarili, sa halip ay bigyan ninyo ng lugar ang galit ng Diyos sapagkat nasusulat, “Ang paghihiganti ay sa akin, ako ang gaganti,” sabi ng Panginoon. Deu 32:3520 Kaya, “Kapag nagutom ang iyong kaaway, pakainin mo siya, kapag nauhaw siya, painumin mo siya sapagkat sa paggawa mo nito ay ibubunton mo sa kaniyang ulo ang nagbabagang uling.” Kaw 25:21-2221 Huwag kang magpatalo sa masama, sa halip ay daigin mo ng mabuti ang masama.
