1 At nangyari, na sa mga araw na iyon ay lumabas ang isang batas mula kay Augusto Cesar na magpatala ang buong sangkatauhan.2 Ang pagpapatalang ito ay unang nangyari nang si Cirenio ay gobernador ng Siria.3 Kaya ang lahat ay pumunta upang makapagpatala, bawat isa sa kaniyang sariling lungsod.4 At si Jose ay umahon din buhat sa Galilea, mula sa lungsod ng Nazaret patungo sa Judea, sa lungsod ni David na tinatawag na Bethlehem dahil siya ay kabilang sa sambahayan at angkan ni David,5 upang magpatalang kasama si Maria, na ipinagkasundong mapangasawa niya, na nasa kabuwanan na noon.6 At nangyari, na habang sila ay naroroon, sumapit ang araw ng kaniyang panganganak.7 At isinilang niya ang kaniyang panganay na anak na lalaki at siya ay binalot ng mahabang tela at inihiga niya sa sabsaban sapagkat wala ng lugar para sa kanila sa bahay-tuluyan.8 Sa lupain ding iyon ay may mga pastol ng tupa na nananatili sa parang at sa gabi ay nagbabantay sa kanilang kawan.9 Narito, tumayo sa tabi nila ang isang anghel ng Panginoon at ang kaluwalhatian ng Panginoon ay nagliwanag sa palibot nila, kaya sila ay labis na natakot.10 At sinabi ng anghel sa kanila, “Huwag kayong matakot. Narito, ipinapahayag ko sa inyo ang ebanghelyo ng malaking kagalakan na darating sa lahat ng tao11 sapagkat sa araw na ito sa lungsod ni David ay ipinanganak sa inyo ang isang Tagapagligtas, na siya ang Cristo, ang Panginoon.12 At ito ang palatandaan sa inyo, matatagpuan ninyo ang sanggol na nakabalot na ng mahabang tela, na nakahiga sa sabsaban.”13 At biglang lumitaw kasama ng anghel ang napakaraming makalangit na hukbo na nagpupuri sa Diyos, na sinabi,14 “Kaluwalhatian sa Diyos sa kataas-taasan, at kapayapaan sa lupa, kaluguran para sa mga tao!”15 At nangyari, nang sila ay iniwan ng mga anghel patungo sa langit, ang mga lalaking pastol ng tupa ay nagsabi sa isa't isa, “Kailangang makapunta tayo hanggang sa Bethlehem at matingnan natin itong pahayag na nangyari, na ipinaalam sa atin ng Panginoon.”16 At sila ay nagmadaling pumaroon at kanilang natagpuan si Maria at si Jose, at ang sanggol na nakahiga sa sabsaban.17 At nang ito ay kanilang nakita, kanilang ipinamalita ang sinabi sa kanila patungkol sa sanggol na ito.18 At ang lahat ng mga nakarinig nito ay namangha sa mga sinabi sa kanila ng mga pastol ng tupa.19 Ngunit iningatan ni Maria ang lahat ng mga salitang ito at pinagbubulay-bulayan sa kaniyang puso.20 At ang mga pastol ng tupa ay bumalik na niluluwalhati at pinupuri ang Diyos sa lahat ng mga bagay na kanilang narinig at nakita ayon sa sinabi sa kanila.21 Nang dumating ang ikawalong araw upang tuliin ang sanggol, ang pangalan namang itinawag sa kaniya ay Jesus, ang itinawag ng anghel bago siya ipinaglihi sa sinapupunan.22 At nang naganap na ang araw ng pagdadalisay ni Maria ayon sa Kautusan ni Moises, dinala nila si Jesus sa Jerusalem upang iharap sa Panginoon,23 (ayon sa nasusulat sa Kautusan ng Panginoon, “Ang bawat batang lalaki na nagbubukas ng sinapupunan ay tatawaging banal sa Panginoon.”)24 at upang maghandog ng hain ayon sa sinabi sa Kautusan ng Panginoon, “Isang pares na batu-bato o dalawang inakay na kalapati.”25 At narito, may isang lalaki sa Jerusalem na ang pangalan ay Simeon. Ang lalaking ito ay matuwid at matapat sa Diyos, na naghihintay sa kaaliwan ng Israel at ang Banal na Espiritu ay sumasakaniya.26 At ito ay ipinahayag na sa kaniya ng Banal na Espiritu na hindi niya mararanasan ang kamatayan hanggang sa makita niya ang Cristo ng Panginoon.27 At siya ay pumunta sa loob ng templo sa pamamagitan ng Espiritu. At habang ang sanggol na si Jesus ay dinadala ng mga magulang sa loob ng templo upang gawin ang mga naaayon sa naging kaugalian sa Kautusan,28 kinarga siya ni Simeon sa kaniyang mga bisig at pinuri ang Diyos, na sinabi,29 “Panginoon, ngayon ay hayaan mo ang iyong alipin na pumanaw nang may kapayapaan ayon sa iyong salita30 sapagkat nakita na ng aking mga mata ang iyong pagliligtas31 na iyong inihanda sa harap ng lahat ng mga tao.32 Ito ay isang liwanag para sa kapahayagan sa mga Gentil at kaluwalhatian ng iyong bayang Israel.”33 At si Jose at ang ina ni Jesus ay namangha sa mga bagay na sinabi patungkol sa kaniya.34 At sila ay binasbasan ni Simeon at sinabi kay Maria na ina ng sanggol, “Narito! Siya ay itinalaga para sa pagbagsak at pagtindig ng marami sa Israel at magiging tanda na kanilang tututulan35 (ngunit sa iyo naman ay isang tabak ang tatagos sa iyong kaluluwa) upang mahayag ang mga pagtatalo mula sa maraming puso.”36 Naroroon din si Ana, isang babaing propeta na anak ni Fanuel, mula sa lipi ni Aser. Siya ay napakatanda na at pitong taon siyang namuhay kasama ng asawa mula sa kaniyang pagkadalaga,37 at siya ay halos walumpu't apat na taon nang balo at hindi na siya umalis sa templo. Araw at gabi siya ay naglilingkod sa Diyos na may mga pag-aayuno at mga pagdalangin.38 Nang siya ay pumasok sa oras ding iyon, siya ay nagpasalamat sa Panginoon at nagsalita patungkol kay Jesus sa kanilang lahat na naghihintay ng katubusan sa Jerusalem.39 Nang natapos nila ang lahat ng mga bagay ayon sa Kautusan ng Panginoon, sila ay bumalik sa Galilea, sa Nazaret na kanilang lungsod.40 Ang bata ay lumaki at lumakas sa espiritu na napuspos ng karunungan at ang biyaya ng Diyos ay sumakaniya.41 Ang kaniyang mga magulang ay pumupunta sa Jerusalem taun-taon para sa Pista ng Paglagpas.42 At nang si Jesus ay labindalawang taong gulang na, sila ay umahon sa Jerusalem ayon sa kaugalian ng kapistahan.43 At pagkatapos ng mga araw ng kapistahan, sa kanilang pag-uwi ang batang si Jesus ay nagpaiwan sa Jerusalem at ito ay hindi nalaman ni Jose at ng kaniyang ina.44 At dahil sa pag-aakalang siya ay kasama sa paglalakbay, sila ay naglakbay pa ng isang araw at siya ay kanilang hinanap sa mga kamag-anakan at sa mga kakilala.45 Ngunit nang siya ay hindi nila natagpuan, sila ay bumalik sa Jerusalem at siya ay hinanap nila.46 At nangyari, pagkalipas ng tatlong araw, siya ay natagpuan nila sa templo na nakaupo sa kalagitnaan ng mga guro na nakikinig at nagtatanong sa kanila.47 Ang lahat ng mga nakapakinig sa kaniya ay namangha sa kaniyang pang-unawa at mga sagot.48 At nang siya ay nakita nila, sila ay nagtaka. At sinabi sa kaniya ng kaniyang ina, “Anak, bakit ganito ang ginawa mo sa amin? Tingnan mo, ang iyong ama at ako ay naghanap sa iyo na nahahapis.”49 Subalit sinabi niya sa kanila, “Bakit ninyo ako hinanap? Hindi ba ninyo alam na kinakailangan kong gawin ang mga bagay patungkol sa aking Ama?”50 Ngunit hindi nila naunawaan ang mga salitang sinabi niya sa kanila.51 At siya ay lumusong na kasama nila at dumating sa Nazaret at naging mapagpasakop sa kanila. At iningatang mabuti ng kaniyang ina sa kaniyang puso ang lahat ng mga salitang ito.52 At si Jesus ay lumago sa karunungan at sa pangangatawan at sa pagbibigay lugod sa Diyos at sa mga tao.
Luke 2
16 At sila ay nagmadaling pumaroon at kanilang natagpuan si Maria at si Jose, at ang sanggol na nakahiga sa sabsaban.
