1 Pagkatayo ni Jesus mula roon, siya ay pumunta patungo sa mga nasasakupan ng Judea hanggang sa kabilang ibayo ng Jordan. Muling naglakbay na sama-sama ang napakaraming tao patungo sa kaniya at kagaya ng kinaugalian niya, sila ay tinuruan niyang muli.2 At ang mga Fariseo na lumapit kay Jesus ay nagtanong sa kaniya upang siya ay subukin nila, “Ipinapahintulot ba sa Kautusan na paalisin ng asawang lalaki ang kaniyang asawang babae?”3 Ngunit sumagot si Jesus na sinasabi sa kanila, “Ano ang iniutos sa inyo ni Moises?”4 Subalit sinabi nila, “Ipinahintulot ni Moises na magsulat ng kasulatan ng paghihiwalay at siya ay paalisin.”5 At sa pagsagot ni Jesus ay sinabi niya sa kanila, “Dahil sa katigasan ng inyong puso sinulat niya ang utos na ito para sa inyo.6 Subalit mula sa simula ng paglalang, ‘ginawa sila ng Diyos na lalaki at babae.’ Gen 1:27; 5:27 ‘Dahil dito, iiwan ng lalaki ang kaniyang ama at ina at makikipag-isa sa kaniyang asawa8 at ang dalawa ay magiging isang laman,’ Gen 2:24 kung kaya hindi na sila dalawa kundi isang laman.9 Kaya nga, ang pinagsama ng Diyos ay huwag paghiwalayin ng tao.”10 At pagdating sa bahay, siya ay muling tinanong ng kaniyang mga alagad patungkol din sa bagay na ito.11 At sinabi niya sa kanila, “Ang sinumang magpapalayas sa kaniyang asawang babae at mag-aasawa ng iba ay nagkakasala ng pangangalunya laban sa kaniya.12 At kapag ang babae ay magpapalayas sa kaniyang asawang lalaki at mag-aasawa ng iba, siya ay nagkakasala ng pangangalunya.”13 At dinala nila kay Jesus ang maliliit na bata upang sila ay kaniyang mahawakan, ngunit sinaway ng mga alagad ang mga nagdadala sa mga bata.14 Subalit labis na nagalit si Jesus nang nakita ito, at sinabi niya sa kanila, “Hayaan ninyong lumapit sa akin ang maliliit na bata at huwag ninyo silang hadlangan, sapagkat sa mga katulad nila nauukol ang paghahari ng Diyos.15 Katotohanang sinasabi ko sa inyo, ang sinumang hindi tatanggap sa paghahari ng Diyos katulad ng isang maliit na bata ay hinding-hindi makakapasok doon.”16 At nang sila ay nayakap ni Jesus, sila ay pinagpala niya nang kaniyang ipinatong ang kaniyang mga kamay sa kanila.17 At nang si Jesus ay papaalis na patungo sa daan, may lalaking patakbong lumapit at lumuhod sa harapan niya at tinanong siya, “Mabuting Guro, ano ang maari kong gawin upang makapagmana ako ng buhay na walang hanggan?”18 Ngunit sinabi ni Jesus sa kaniya, “Bakit mo sinasabing ako ay mabuti? Walang sinumang mabuti maliban sa isa, ang Diyos.19 Alam mo ang mga utos, ‘Huwag kang mangalunya,’ ‘Huwag kang papatay,’ ‘Huwag kang magnakaw,’ ‘Huwag kang sumaksi sa kasinungalingan,’ Exo 20:13-16; Deu 5:17-20 ‘Huwag kang mandaya,’ Deu 24:14 ‘Igalang mo ang iyong ama at ina.’ ” Exo 20:12; Deu 5:1620 Ngunit sumagot ang lalaki na sinabi sa kaniya, “Guro, ang lahat ng mga bagay na ito ay aking sinunod mula sa aking pagkabata.”21 Ngunit nang si Jesus ay tumingin sa kaniya, siya ay inibig niya at sinabi sa kaniya, “Isang bagay ang kulang sa iyo. Humayo ka at ipagbili mo ang lahat mong tinatangkilik at ibigay mo ang salapi sa mga dukha at magkakaroon ka ng kayamanan sa langit. Pagkatapos pumarito ka at sumunod ka sa akin na pinapasan ang krus.”22 At sa pagkalungkot ng lalaki sa salitang ito, siya ay umalis na namimighati sapagkat mayroon siyang napakaraming ari-arian.23 At sa kaniyang pagtingin sa palibot, sinasabi ni Jesus sa kaniyang mga alagad, “Gaano kahirap sa kanila, na mayroong mga kayamanan, ang pagpasok sa kaharian ng Diyos!”24 Ngunit namangha ang mga alagad sa kaniyang mga salita, kaya muling sumagot si Jesus na sinabi sa kanila, “Mga anak, gaano kahirap sa kanila, na nagtitiwala sa mga kayamanan, na pumasok sa kaharian ng Diyos.25 Mas madali pang dumaan ang kamelyo sa butas ng karayom kaysa sa pagpasok ng mayaman sa kaharian ng Diyos.”26 Kaya sila ay labis na nanggilalas na sinasabi sa isa't isa, “Sino ang maaaring maligtas?”27 At nang tumingin si Jesus sa kanila, sinabi niya, “Hindi ito maaaring magawa ng mga tao subalit hindi gayon sa Diyos, sapagkat sa Diyos ay maaring mangyari ang lahat ng mga bagay.”28 At si Pedro ay nagsimulang magsabi sa kaniya, “Narito, iniwan namin ang lahat at sumunod sa iyo.”29 At nang sumagot si Jesus, sinabi niya, “Katotohanang sinasabi ko sa inyo, walang sinumang nag-iwan ng bahay, o mga kapatid na lalaki, o mga kapatid na babae, o ama, o ina, o asawang babae, o mga anak, o mga lupain dahil sa akin at dahil sa ebanghelyo30 ang hindi makakatanggap ngayon, sa panahong ito, ng isandaang beses ng mga bahay, mga kapatid na lalaki at babae, mga ina, mga anak at ng mga lupain na may pagmamalupit, ngunit sa darating na kapanahunan, siya ay tatanggap ng buhay na walang hanggan.31 Ngunit ang mga una ay magiging huli at ang huli ay magiging una.”32 Nang sila ay nasa daan paahon sa Jerusalem, namangha sila na si Jesus ay nasa unahan na nila at sa kanilang pagsunod sa kaniya, sila ay natakot. At nang muli niyang isinama ang labindalawang alagad, sinimulan niyang sabihin sa kanila ang patungkol sa mga bagay na malapit nang mangyari sa kaniya.33 Sinabi ni Jesus, “Narito, tayo ay aahon sa Jerusalem at ang Anak ng Tao ay ipagkakanulo sa mga punong saserdote at sa mga eskriba, at siya ay kanilang hahatulan ng kamatayan, at siya ay ipagkakanulo nila sa mga Gentil.34 At siya ay kukutyain nila, siya ay hahagupitin nila, siya ay duduraan nila at siya ay papatayin nila, at sa ikatlong araw, siya mismo ay muling babangon.”35 At lumapit kay Jesus sina Santiago at Juan na mga anak ni Zebedeo, na nagsasabi, “Guro, ninanais namin na anuman ang aming hihilingin sa iyo ay iyong gagawin sa amin.”36 At sinabi ni Jesus sa kanila, “Ano ang ibig ninyong gawin ko para sa inyo?”37 Kaya sinabi nila sa kaniya, “Ipagkaloob mo sa amin na kami ay makaupo sa iyong kaluwalhatian, ang isa ay sa bahaging kanan mo at ang isa ay sa bahaging kaliwa mo.”38 Subalit sinabi ni Jesus sa kanila, “Hindi ninyo nalalaman ang inyong hinihiling. Magagawa ba ninyong inumin ang sarong aking iinumin at mabawtismuhan ng bawtismong ibinabawtismo sa akin?”39 At sinabi nila kay Jesus, “Magagawa namin.” Subalit sinabi ni Jesus sa kanila, “Ang saro nga na aking iniinom ay iinumin ninyo at ang bawtismo na ibinabawtismo sa akin ay ibabawtismo sa inyo.40 Ngunit ang pag-upo sa aking bahaging kanan at sa aking bahaging kaliwa ay hindi ako ang magkakaloob kundi ito ay ipagkakaloob sa kanila na pinaghandaan nito.”41 At nang narinig ito ng sampu, nagsimula ang kanilang labis na galit kina Santiago at Juan.42 Ngunit pagkatawag ni Jesus sa kanila, sinabi niya sa kanila, “Alam na ninyo na ang mga kinikilala na namumuno sa mga Gentil ay namumuno na may pagkapanginoon sa kanila, at ang mga dakila sa kanila ay namamahala na may pamimilit sa kanila.43 Subalit huwag itong mangyaring gayon sa inyo kundi ang sinumang magnanais na maging dakila sa inyo ay magiging tagapaglingkod ninyo.44 At sinuman sa inyo ang magnanais na maging pangunahin ay magiging alipin ng lahat45 sapagkat kahit ang Anak ng Tao ay hindi pumarito upang paglingkuran kundi upang maglingkod at upang ibigay ang kaniyang buhay bilang pantubos sa marami.”46 At sila ay dumating sa Jerico. At nang si Jesus ay papalabas sa Jerico kasama ang kaniyang mga alagad at ang napakaraming tao, ang bulag na si Bartimeo na anak ni Timeo ay nakaupo sa tabi ng daan at namamalimos.47 At nang narinig niya na si Jesus na taga-Nazaret ay naroroon, nagsimula siyang sumigaw at sinabi, “Jesus, Anak ni David, mahabag ka sa akin!”48 At marami ang sumaway sa kaniya upang mapatahimik siya ngunit lalo pa siyang sumigaw, “Anak ni David, mahabag ka sa akin.”49 At nang huminto si Jesus, sinabi niya na tawagin siya. At tinawag nila ang bulag na sinasabi sa kaniya, “Lakasan mo ang iyong loob. Tumindig ka, tinatawag ka ni Jesus.”50 At pagkatapon niya ng kaniyang balabal, siya ay tumayo at lumapit kay Jesus.51 Kaya sumagot si Jesus na sinabi sa kaniya, “Ano ang ibig mong gawin ko sa iyo?” At ang bulag ay nagsabi sa kaniya, “Rabbi, ang mapanumbalik ang aking paningin.”52 At sinabi ni Jesus sa kaniya, “Humayo ka, ang iyong pananampalataya ang nagpagaling sa iyo.” At kaagad napanumbalik ang paningin ng bulag at siya ay sumunod kay Jesus sa daan.
