1 Pagkaraan ng limang araw, lumusong ang pinakapunong saserdote na si Ananias kasama ang matatanda at ang isang makata na si Tertulio. Sila ang nagpabatid sa gobernador ng mga bagay laban kay Pablo.2 At nang si Pablo ay naipatawag, si Tertulio ay nagsimula upang magparatang, na sinasabi, “Dahil sa iyo ay tinatamasa namin ang malaking katahimikan at mga pagbabagong nangyayari sa bansang ito sa pamamagitan ng iyong kalinga.3 Buong pagpapasalamat naming tinatanggap ito sa lahat ng paraan at sa lahat ng dako, kagalang-galang na Felix.4 At upang ikaw ay hindi ko maabala pa, sa iyong kagandahang-loob, ako ay sumasamo na kami ay iyong pakinggan sa ilang sandali5 dahil natagpuan namin na ang lalaking ito ay salot at nagpapasimuno ng paghihimagsik sa lahat ng mga Judio sa buong daigdig at pinuno ng pangkat ng mga Nazareno.6 Pinagsisikapan din niyang lapastanganin ang templo kaya siya ay dinakip namin at ibig naming mahatulan alinsunod sa aming kautusan.7 Ngunit pagdating ng pinunong kapitan na si Lisias, siya ay marahas na kinuha sa aming mga kamay8 at kaniyang iniutos sa mga nagsasakdal sa kaniya na pumunta sa iyo upang sa pamamagitan ng iyong sariling pagsisiyasat ay malaman mo ang lahat ng mga bagay na ipinaparatang namin laban sa kaniya.”9 Ang mga Judio ay sumang-ayon din sa pamamagitan ng paggiit na ganito ang mga nangyayari.10 At nang si Pablo ay hinudyatan ng gobernador na magsalita, siya ay sumagot, “Dahil nalalaman ko na ikaw ay hukom sa loob ng maraming taon sa bansang ito, lalo akong sumigla na maipagtanggol ang aking sarili,11 sapagkat maari mong malaman na wala pang labindalawang araw buhat nang ako ay umahon sa Jerusalem upang sumamba.12 At hindi nila ako natagpuan sa templo na nakikipagtalo kaninuman, ni gumagawa ng kaguluhan sa napakaraming tao, ni sa mga sinagoga, ni sa lungsod,13 ni hindi nila kayang patunayan ang patungkol sa mga ipinaparatang nila sa akin ngayon.14 Ngunit inaamin ko ito sa iyo, na ayon sa Daan na kanilang tinatawag na pangkat ay sa gayon ko pinaglilingkuran ang Diyos ng aming mga ninuno at sinasampalatayanan ko ang lahat ng nakasulat ayon sa Kautusan at sa mga Propeta.15 Ako ay mayroong pag-asa sa Diyos, na kanila rin namang hinihintay, na magkakaroon ng muling pagkabuhay ng mga patay, mga matuwid at mga hindi matuwid.16 Dahil dito, ako ay nagsisikap upang palaging magkaroon ng malinis na budhi sa harap ng Diyos at ng mga tao.17 “Ngunit pagkaraan ng maraming taon, ako ay naparito upang magdala ng bahagi sa mga nangangailangan sa aking bansa at ng mga haing handog.18 Dahil sa mga ito, ang ilang mga Judio na taga-Asya ay natagpuan ako na pinadalisay sa templo na hindi kasama ng maraming tao, ni kasama sa kaguluhan.19 Sila ang dapat na naririto sa harapan mo at magsakdal kung mayroon silang anumang bagay laban sa akin,20 o kaya ang mga taong ito mismo ang hayaang magsabi kung anong masamang gawa ang natagpuan nila habang ako ay nakatayo sa Sanhedrin.21 Maliban sa isang tinig na ito na aking isinigaw nang ako ay nakatayo sa kalagitnaan nila, ‘Tungkol sa muling pagkabuhay ng mga patay, ako ay hinahatulan sa harapan ninyo sa araw na ito.’ ”22 Nang narinig ni Felix ang mga bagay na ito, sila ay kaniyang pinigilan dahil lalong ganap ang nalalaman niya patungkol sa Daan. Sinabi niya, “Kung makalusong si Lisias na pinunong kapitan, aking sisiyasating mabuti ang mga bagay patungkol sa inyo.”23 At iniutos niya sa senturion na ingatan si Pablo at siya ay bigyan ng kaluwagan at huwag bawalan ang sinumang kaibigan niya na siya ay paglingkuran o dalawin.24 Pagkaraan ng ilang mga araw, dumating si Felix kasama ang kaniyang asawang si Drusila na isang Judio. Ipinatawag niya si Pablo at pinakinggan siya patungkol sa pananampalataya kay Cristo.25 Ngunit dahil sa kaniyang pagpapaliwanag patungkol sa katuwiran, sa pagpipigil sa sarili at sa darating na paghahatol, si Felix ay natakot at sumagot, “Umalis ka muna ngayon at kapag nagkaroon ako ng pagkakataon, ipatatawag kita.”26 At sa panahon ding iyon ay inaasahan niya na bibigyan siya ni Pablo ng salapi upang siya ay mapalaya, kaya siya ay madalas din niyang ipinatatawag at nakikipag-usap sa kaniya.27 Ngunit pagkaraan ng dalawang taon, si Felix ay pinalitan ni Porcio Festo. Sa pagnanais naman ni Felix na siya ay kalugdan ng mga Judio, pinabayaan niyang nakatanikala si Pablo.
