1 At nakita ko ang isang anghel na bumababa mula sa langit na tinataglay ang susi ng walang hanggang kalaliman at nasa kaniyang kamay ang isang malaking tanikala.2 At hinuli niya ang dragon, ang sinaunang ahas na siyang diyablo at Satanas, at siya ay ginapos niya sa loob ng isang libong taon,3 at itinapon siya ng anghel sa walang hanggang kalaliman at sinarahan siya at senelyuhan ang ibabaw nito hanggang sa matapos ang isang libong taon upang hindi na niya madaya ang mga bansa. Ngunit pagkatapos ng mga bagay na ito, siya ay kinakailangang palayain sa maikling panahon.4 At nakita ko ang mga luklukan at sila na nakaupo sa mga luklukan, at ang paghatol ay ibinigay sa kanila. At nakita ko ang mga kaluluwa niyaong mga pinugutan ng ulo dahil sa patotoo ni Jesus at dahil sa salita ng Diyos, at sila na mga hindi sumamba sa mabangis na hayop o sa kaniyang larawan, at hindi tumanggap ng kaniyang tatak sa kanilang noo at sa kanilang kamay. At sila ay nabuhay at nagharing kasama ni Cristo sa loob ng isang libong taon.5 Subalit ang mga natira sa mga patay ay hindi nabuhay hanggang sa matapos ang isang libong taon. Ito ang unang muling pagkabuhay.6 Pinagpala at banal yaong may bahagi sa unang muling pagkabuhay. Sa kanila ay walang kapangyarihan ang ikalawang kamatayan, sa halip ay magiging mga saserdote sila ng Diyos at ni Cristo, at sila ay maghaharing kasama niya sa loob ng isang libong taon.7 At kapag matapos na ang isang libong taon, si Satanas ay palalayain mula sa kaniyang bilangguan,8 at siya ay lalabas upang dayain ang mga bansa na nasa apat na sulok ng daigdig, ang Gog at ang Magog, upang sila ay tipunin para sa digmaan na ang kanilang bilang ay katulad ng buhangin sa dagat.9 Kaya sila ay umahon sa kalaparan ng daigdig at pinalibutan ang kampo ng mga banal at ang pinakamamahal na lungsod, ngunit bumaba ang apoy galing sa Diyos mula sa langit at nilamon sila.10 At ang diyablo na siyang nandaya sa kanila ay itinapon sa lawa ng apoy at ng asupre, kung saan naroroon ang mabangis na hayop at ang bulaang propeta, at sila ay pahihirapan araw at gabi, magpakailan pa man.11 At nakita ko ang dakilang puting trono at yaong nakaupo roon, na ang lupa at ang langit ay tumakas mula sa kaniyang harapan at walang natagpuang lugar para sa kanila.12 At nakita ko ang mga taong patay, mga hindi dakila at mga dakila, na nakatayo sa harapan ng Diyos. At ang mga aklat ay binuksan at ang isa pang aklat ay binuksan, ito ay ang aklat ng buhay. At ang mga patay ay hinatulan ayon sa kanilang mga gawa mula sa mga nakasulat sa mga aklat.13 At isinuko ng dagat ang mga patay na nasa kaniya, at isinuko ng Kamatayan at ng Hades ang mga patay na nasa kanila at ang bawat isa sa kanila ay hinatulan ayon sa kanilang mga gawa.14 At ang Kamatayan at ang Hades ay itinapon sa lawa ng apoy. Ito ang ikalawang kamatayan.15 At kung ang sinuman ay hindi natagpuan na nakasulat sa aklat ng buhay, siya ay itinapon sa lawa ng apoy.
