1 May isang lalaki sa mga Fariseo na ang pangalan ay Nicodemo. Siya ay isang pinuno ng mga Judio.2 Siya ay pumunta kay Jesus nang gabi at sinabi, “Rabbi, alam namin na ikaw ay guro na pumarito mula sa Diyos sapagkat walang makakagawa ng mga tanda na iyong ginagawa maliban na sumasakaniya ang Diyos.”3 Tumugon si Jesus at sinabi sa kaniya, “Katotohanan, katotohanang sinasabi ko sa iyo, maliban na ang sinuman ay ipanganak na muli, hindi niya maaring makita ang paghahari ng Diyos.”4 Itinanong ni Nicodemo sa kaniya, “Papaano maipapanganak ang taong matanda na? Makakapasok pa ba siyang muli sa sinapupunan ng kaniyang ina at ipanganak?”5 Sumagot si Jesus, “Katotohanan, katotohanang sinasabi ko sa iyo, maliban na ang tao ay ipanganak sa tubig at sa Espiritu, hindi siya makakapasok sa paghahari ng Diyos.6 Ang ipinanganak sa laman ay laman at ang ipinanganak sa Espiritu ay espiritu.7 Huwag kang magtaka na sinabi ko sa iyo, ‘Kinakailangang ipanganak kayong muli.’8 Ang hangin ay umiihip kung saan nito ibig. Naririnig mo ang ugong nito, ngunit hindi mo alam kung saan ito nanggagaling at kung saan ito pupunta. Gayundin ang bawat ipinanganak sa Espiritu.”9 Tumugon si Nicodemo at sinabi sa kaniya, “Papaano mangyayari ang mga bagay na ito?”10 Sumagot si Jesus at sinabi sa kaniya, “Ikaw ay guro sa Israel at hindi mo alam ang mga bagay na ito?11 Katotohanan, katotohanang sinasabi ko sa iyo, ang aming nalalaman ay sinasabi namin. Pinatotohanan namin ang mga nakita namin, ngunit hindi ninyo tinanggap ang aming patotoo.12 Yamang sinabi ko sa inyo ang mga bagay na panlupa at hindi ninyo pinaniwalaan, paano kayo maniniwala kung sasabihin ko ang mga makalangit na bagay?13 Walang pumaitaas sa langit maliban sa kaniya na bumaba mula sa langit, siya ang Anak ng Tao na nasa langit.14 Kung paanong itinaas ni Moises ang ahas sa ilang, sa gayunding paraan kinakailangang itaas ang Anak ng Tao,15 upang ang sinumang sumampalataya sa kaniya ay hindi mapahamak kundi magkaroon ng buhay na walang hanggan,16 sapagkat sa ganitong paraan ay inibig ng Diyos ang sangkatauhan kaya ipinagkaloob niya ang kaniyang bugtong na Anak upang ang sinumang sumampalataya sa kaniya ay hindi mapahamak kundi magkaroon ng buhay na walang hanggan.17 Hindi isinugo ng Diyos ang kaniyang anak sa sanlibutan upang hatulan ang sanlibutan kundi upang ang sangkatauhan ay maligtas sa pamamagitan niya.18 “Siya na sumasampalataya sa kaniya ay hindi hinahatulan subalit ang hindi sumasampalataya ay nahatulan na sapagkat siya ay hindi sumampalataya sa pangalan ng bugtong na Anak ng Diyos.19 At ito ang hatol, ang ilaw ay dumating sa sanlibutan, ngunit inibig ng mga tao ang kadiliman nang higit pa kaysa sa ilaw sapagkat ang kanilang mga gawa ay masasama.20 Ang bawat isang gumagawa ng masama ay namumuhi sa ilaw. Hindi siya lumalapit sa ilaw upang ang kaniyang mga gawa ay hindi malantad.21 Siya na nagsasagawa ng katotohanan ay lumalapit sa ilaw upang makita na ang kaniyang mga gawa ay ginawa sa pamamagitan ng Diyos.”22 Pagkatapos ng mga bagay na ito, pumunta si Jesus at ang kaniyang mga alagad sa lupain ng Judea at nanatili siya roon kasama nila at nagbawtismo.23 Si Juan ay nagbabawtismo rin sa Enon na malapit sa Salim sapagkat maraming tubig doon. Maraming tao ang pumaroon at nabawtismuhan24 sapagkat hindi pa nakabilanggo noon si Juan.25 Nagkaroon ng pagtatalu-talo patungkol sa pagdadalisay ang mga alagad ni Juan at ang mga pinuno ng mga Judio.26 Sila ay lumapit kay Juan at sinabi sa kaniya, “Rabbi, narito, ang kasama mo sa ibayo ng Jordan na iyong pinatotohanan ay nagbabawtismo at lahat ay pumupunta sa kaniya.”27 Tumugon si Juan at nagsabi, “Hindi makakatanggap ng anuman ang isang tao maliban na ito ay ipinagkaloob sa kaniya mula sa langit.28 Kayo mismo ang nagpapatotoo na aking sinabi, ‘Hindi ako ang Cristo’ ngunit ‘ako ay isinugong una sa kaniya.’29 Ang lalaking ikakasal ang siyang may babaing ikakasal. Ang kaibigan ng lalaking ikakasal na nakatayo at nakikinig sa kaniyang tinig ay lubos na nagagalak sapagkat naririnig niya ang tinig ng lalaking ikakasal. Sa ganito ring paraan ako ay lubos na nagagalak.30 Kinakailangang siya ay maging higit na dakila at ako ay maging higit na mababa.31 Siya na nagmula sa itaas ay higit sa lahat. Siya na nagmula sa lupa ay taga-lupa at nagsasalita ng ukol sa lupa. Siya na nagmula sa langit ay higit sa lahat,32 at kung anuman ang kaniyang nakita at narinig, ito ang pinatotohanan niya ngunit walang sinumang tumanggap sa kaniyang patotoo.33 Siya na tumanggap ng kaniyang patotoo ang nagpatunay na ang Diyos ay totoo.34 Siya na isinugo ng Diyos ay nagsasalita ng mga salita ng Diyos sapagkat ibinibigay ng Diyos ang Espiritu nang walang sukat.35 Iniibig ng Ama ang Anak kaya ibinigay niya ang lahat ng mga bagay sa kaniyang mga kamay.36 Siya na sumasampalataya sa Anak ay may buhay na walang hanggan. Ang hindi sumasampalataya sa Anak ay hindi makakakita ng buhay, subalit ang poot ng Diyos ay nananatili sa kaniya.”
Matthew 18
1 Sa oras ding iyon ay lumapit ang mga alagad kay Jesus na sinasabi, “Sino kung gayon ang pinakadakila sa paghahari ng langit?”2 Kaya tinawag ni Jesus sa kaniya ang isang maliit na bata at pinatayo sa kalagitnaan nila.3 At sinabi niya, “Katotohanang sinasabi ko sa inyo, maliban na kayo ay magbago at maging katulad ng maliliit na bata, hinding-hindi kayo makakapasok sa paghahari ng langit.4 Kaya ang sinumang magpakumbaba ng kaniyang sarili katulad ng maliit na batang ito ay siyang pinakadakila sa paghahari ng langit.5 At ang sinumang tatanggap sa isa sa maliliit na batang katulad nito sa aking pangalan ay tinatanggap ako.6 “Ngunit ang sinumang makakapagpatisod ng isa sa maliliit na ito na sumasampalataya sa akin, mabuti pa sa kaniya na bitinan ng malaking gilingang-bato sa kaniyang leeg at siya ay ilunod sa kalaliman ng dagat.7 “Sa aba ng sangkatauhan dahil sa mga katitisuran sapagkat kinakailangan na ang mga katitisuran ay dumating. Gayunpaman, sa aba ng taong pinanggagalingan ng katitisuran!8 “Kaya kung ang iyong kamay o ang iyong paa ang tumitisod sa iyo, putulin mo ang mga ito at itapon mong palayo sa iyo. Higit na mabuti sa iyo na pumasok sa buhay na pilay o baldado kaysa may dalawang kamay o may dalawang paa na ihahagis sa apoy na walang hanggan.9 At kung ang iyong mata ang tumitisod sa iyo, dukutin mo ito at itapon mong palayo sa iyo. Higit na mabuti sa iyo na pumasok sa buhay na may isang mata kaysa may dalawang mata na ihahagis sa apoy na walang hanggan.10 “Mag-ingat kayo na huwag ninyong hahamakin ang isa sa maliliit na ito sapagkat sinasabi ko sa inyo na ang kanilang mga anghel sa langit ay palagiang nagmamasid sa harapan ng aking Ama na siyang nasa langit11 dahil ang Anak ng Tao ay pumarito upang iligtas ang mga napahamak.12 “Ano sa palagay ninyo? Kapag mangyari sa isang tao na may isandaang tupa at ang isa sa mga ito ay naligaw, hindi nga ba niya iiwanan ang siyamnapu't siyam at pumunta sa kabundukan na hinanap yaong naliligaw?13 Kapag mangyaring matagpuan niya ito, katotohanang sinasabi ko sa inyo, siya ay higit na nagagalak sa tupang iyon kaysa sa siyamnapu't siyam na hindi naligaw.14 Gayundin naman, hindi kalooban ng inyong Ama na nasa langit na mapahamak ang isa sa maliliit na ito.15 “At kapag ang iyong kapatid ay magkasala laban sa iyo, puntahan mo siya at sabihin mo sa kaniya ang kaniyang kasalanan na kayong dalawa lang. Kapag siya ay makinig sa iyo, naipanumbalik mo ang iyong kapatid.16 Ngunit kapag ayaw ka niyang pakinggan, magsama ka pa ng isa o dalawa upang ‘sa bibig ng dalawa o tatlong saksi ay mapapagtibay ang bawat salita.’ Deu 19:1517 Ngunit kapag ayaw niya silang pakinggan, sabihin mo ito sa iglesiya. Subalit kapag ayaw rin niyang pakinggan ang iglesiya, ituring mo siyang katulad ng isang pagano at maniningil ng buwis.18 “Katotohanang sinasabi ko sa inyo, kung anuman ang inyong talian sa lupa ay natalian na sa langit at kung anuman ang inyong kalagan sa lupa ay nakalagan na sa langit.19 “Sinasabi kong muli sa inyo, kapag ang dalawa sa inyo ay magkasundo sa kanilang hihilingin patungkol sa anumang bagay sa lupa, ito ay mangyayari sa kanila mula sa aking Ama na nasa langit20 sapagkat kung saan ang dalawa o tatlo ay nagkatipon sa aking pangalan, ako ay naroroon sa kanilang kalagitnaan.”21 Pagkatapos ay lumapit si Pedro sa kaniya at sinabi, “Panginoon, makailang ulit bang magkakasala sa akin ang aking kapatid at siya ay aking patatawarin? Hanggang sa makapito ba?”22 Sinabi ni Jesus sa kaniya, “Sinasabi ko sa iyo na hindi hanggang sa makapito kundi hanggang sa makapitumpung pitong ulit.23 Dahil dito, ang paghahari ng langit ay inihalintulad sa isang hari na nais maningil ng pautang sa kaniyang mga alipin.24 At nang nagsimula na siyang maningil, iniharap sa kaniya ang isa na may utang ng sampung libong talento°.25 Ngunit dahil sa wala siyang maibayad, iniutos ng kaniyang panginoon na siya ay ipagbili, gayundin ang kaniyang asawa at mga anak at ang lahat ng kaniyang mga tinatangkilik upang makabayad.26 Subalit ang alipin ay nanikluhod at sinamba siya na sinasabi, ‘Panginoon, pagtiyagaan mo ako at babayaran ko sa iyo ang lahat.’27 Kaya ang panginoon ng aliping iyon ay nahabag at pinawalan siya at pinatawad ang kaniyang utang.28 “Ngunit nang lumabas ang alipin ding iyon, natagpuan niya ang isa sa kaniyang kapwa alipin na may utang sa kaniya ng isandaang denaryo° kaya hinawakan niya at sinakal na sinasabi, ‘Bayaran mo ako sa lahat mong pagkakautang.’29 Kaya ang kaniyang kapwa alipin ay nanikluhod sa kaniyang paanan at nagsumamo sa kaniya na sinasabi, ‘Pagtiyagaan mo ako at lahat ay babayaran ko sa iyo.’30 Subalit hindi siya pumayag. Sa halip, siya ay umalis at ipinabilanggo niya ang kapwa alipin hanggang sa mabayaran niya ang kaniyang pagkakautang.31 At nang nakita ng kaniyang mga kapwa alipin ang nangyari, sila ay labis na namighati. Kaya sila ay pumunta at isinumbong nila sa kanilang panginoon ang lahat na nangyari.32 Pagkatapos siyang maipatawag, ang kaniyang panginoon ay nagsabi sa kaniya, ‘Ikaw na masamang alipin, ipinatawad ko sa iyo ang lahat ng iyong pagkakautang dahil nagsumamo ka sa akin,33 hindi ba nararapat na ikaw ay mahabag din sa iyong kapwa alipin katulad din ng pagkahabag ko sa iyo?’34 At sa labis na galit ng kaniyang panginoon, siya ay ibinigay sa mga tagapagpahirap hanggang sa mabayaran niya ang lahat ng kaniyang pagkakautang.35 “Gayundin naman ang gagawin sa inyo ng aking Ama na nasa langit kapag hindi kayo magpatawad nang mula sa inyong puso sa bawat kapatid sa kanilang pagsalangsang.”
