1 Gayon man ay hindi magkakaroon ng paguulap sa kaniya na nasa kahapisan. Nang unang panahon ay dinala niya sa pagkawalang kabuluhan ang lupain ng Zabulon at ang lupain ng Nephtali, nguni't sa huling panahon ay ginawa niyang maluwalhati, sa daang patungo sa dagat, sa dako roon ng Jordan, ng Galilea ng mga bansa.2 Ang bayan na lumalakad sa kadiliman ay nakakita ng dakilang liwanag: silang nagsisitahan sa lupain ng lilim ng kamatayan, sa kanila sumilang ang liwanag.3 Iyong pinarami ang bansa, iyong pinalago ang kanilang kagalakan: sila'y nangagagalak sa harap mo ayon sa kagalakan sa pagaani, gaya ng mga tao na nangagagalak pagka nangagbabahagi ng samsam.4 Sapagka't ang pamatok na kaniyang pasan, at ang pingga sa kaniyang balikat, ang panghampas ng mamimighati sa kaniya, ay iyong sinira na gaya sa kaarawan ng Madian.5 Sapagka't ang lahat na sakbat ng nasasakbatang tao sa kaguluhan, at ang mga kasuutang puno ng dugo ay magiging para sa pagkasunog, para sa mitsa ng apoy.6 Sapagka't sa atin ay ipinanganak ang isang bata, sa atin ay ibinigay ang isang anak na lalake; at ang pamamahala ay maaatang sa kaniyang balikat: at ang kaniyang pangalan ay tatawaging Kamanghamangha, Tagapayo, Makapangyarihang Dios, Walang hanggang Ama, Pangulo ng Kapayapaan.7 Ang paglago ng kaniyang pamamahala at ng kapayapaan ay hindi magkakaroon ng wakas, sa luklukan ni David, at sa kaniyang kaharian, upang itatag, at upang alalayan ng kahatulan at ng katuwiran mula ngayon hanggang sa magpakailan man. Isasagawa ito ng sikap ng Panginoon ng mga hukbo.8 Nagpasabi ang Panginoon sa Jacob, at naliliwanagan ang Israel,9 At malalaman ng buong bayan ng Ephraim, at ng nananahan sa Samaria, na nagsasabi sa kapalaluan at sa pagmamatigas ng ulo,10 Ang mga laryo ay nangahulog, nguni't aming itatayo ng tinabas na bato: ang mga sikomoro ay nangaputol, nguni't aming papalitan ng mga cedro.11 Kaya't itataas ng Panginoon laban sa kaniya ang mga kaaway ng Rezin, at manghihikayat ng kaniyang mga kaalit;12 Ang mga taga Siria sa unahan, at ang mga Filisteo sa likuran; at kanilang lalamunin ang Israel ng bukang bibig. Sa lahat na ito ang kaniyang galit ay hindi napawi, kundi ang kaniyang kamay ay laging nakaunat.13 Gayon ma'y ang bayan ay hindi nagbalik-loob sa kaniya na sumakit sa kanila, o hinanap man nila ang Panginoon ng mga hukbo.14 Kaya't puputulin ng Panginoon sa Israel ang ulo't buntot, ang sanga ng palma at ang tambo, sa isang araw.15 Ang matanda at ang marangal na tao, siyang ulo; at ang propeta na nagtuturo ng mga kabulaanan, siyang buntot.16 Sapagka't silang nagsisipatnubay ng bayang ito ay siyang nangagliligaw; at silang pinapatnubayan ay nangapapahamak.17 Kaya't ang Panginoon ay hindi magagalak sa kanilang mga binata, ni mahahabag man sa kanilang mga ulila at mga babaing bao: sapagka't bawa't isa ay marumi at manggagawa ng kasamaan, at bawa't bibig ay nagsasalita ng kamangmangan. Sa lahat na ito ang galit niya ay hindi napawi, kundi ang kaniyang kamay ay laging nakaunat.18 Sapagka't ang kasamaan ay sumusunog na gaya ng apoy; pumupugnaw ng mga dawag at mga tinikan: oo, nagaalab na sa siitan sa gubat, at umiilanglang na paitaas sa mga masinsing ulap na usok.19 Sa poot ng Panginoon ng mga hukbo ay nasusunog ang lupain: ang bayan naman ay gaya ng panggatong sa apoy; walang taong mahahabag sa kaniyang kapatid.20 At isa'y susunggab ng kanang kamay, at magugutom; at kakain ng kaliwa, at hindi sila mabubusog: sila'y magsisikain bawa't isa ng laman ng kaniyang sariling bisig:21 Ang Manases, ay kakanin ang Ephraim; at ang Ephraim, ay ang Manases: at sila kapuwa ay magiging laban sa Juda. Sa lahat na ito ang galit niya ay hindi napawi, kundi ang kaniyang kamay ay laging nakaunat.
John 1
1 Sa simula ay naroroon na ang Salita, at ang Salita ay sumasa Diyos at ang Salita ay Diyos.2 Siya ay sumasa Diyos buhat nang simula.3 Ang lahat ng mga bagay ay nilikha sa pamamagitan niya, kung wala siya ay walang anumang nilikhang bagay ang nalikha.4 Ang buhay ay nasa kaniya at ang buhay ay ang ilaw ng mga tao5 at ang ilaw ay nagliwanag sa kadiliman at hindi ito tinanggap ng kadiliman.6 May lalaking isinugong mula sa Diyos na ang pangalan ay Juan.7 Siya ay pumarito bilang saksi upang magpatotoo patungkol sa Ilaw upang ang lahat ay sumampalataya sa pamamagitan niya.8 Hindi siya ang Ilaw, ngunit siya ay isinugo upang magpatotoo patungkol sa Ilaw.9 Ang tunay na Ilaw ay siya na nagbibigay liwanag sa bawat taong pumaparito sa sanlibutan.10 Siya ay nasa sanlibutan at ang sanlibutan ay nilikha sa pamamagitan niya, ngunit hindi siya kinilala ng sangkatauhan.11 Siya ay pumunta sa kaniyang sariling mga tao ngunit hindi siya tinanggap ng kaniyang sariling mga tao.12 Ngunit ang lahat ng mga tumanggap sa kaniya ay pinagkalooban niya ng karapatang maging mga anak ng Diyos, sila ay ang mga sumampalataya sa kaniyang pangalan.13 Sila ay ipinanganak hindi sa pamamagitan ng dugo, ni sa pamamagitan ng kalooban ng laman, ni sa pamamagitan ng kalooban ng tao, kundi sa pamamagitan ng kalooban ng Diyos.14 Ang Salita ay nagkatawang-tao at nanahang kasama namin at namasdan namin ang kaniyang kaluwalhatian, ang kaluwalhatian ng bugtong na Anak ng Ama, na puspos ng biyaya at katotohanan.15 Si Juan ay nagpapatotoo patungkol sa kaniya at sumigaw na nagsasabi, “Siya ang aking sinasabi, ‘Ang paparitong kasunod ko ay higit kaysa akin sapagkat siya ay una sa akin.’ ”16 At mula sa kaniyang kapuspusan, tayong lahat ay tumanggap din ng tuluy-tuloy na biyaya,17 sapagkat ang Kautusan ay ibinigay sa pamamagitan ni Moises, ngunit ang biyaya at ang katotohanan ay dumating sa pamamagitan ni Jesu-Cristo.18 Walang taong nakakita kailanman sa Diyos. Ang bugtong na Anak na nasa piling ng Ama ang siyang naghayag sa kaniya.19 Ito ang patotoo ni Juan nang isugo sa kaniya ng mga pinuno ng mga Judio ang mga saserdote at mga Levita mula sa Jerusalem upang tanungin siya, “Sino ka?”20 Siya ay nagtapat at hindi nagkaila. Kaniyang ipinagtapat, “Hindi ako ang Cristo.”21 Siya ay tinanong nila, “Sino ka ba talaga? Ikaw ba si Elias?” Sinabi niya, “Hindi ako.” “Ikaw ba ang propeta?” Sumagot siya, “Hindi.”22 Kaya sinabi nila sa kaniya, “Sino ka ba talaga? Sabihin mo sa amin nang sa gayon ay maibigay namin ang sagot sa nagsugo sa amin. Ano ang masasabi mo patungkol sa iyong sarili?”23 Sinabi niya, “Ako ‘yaong tinig na sumisigaw sa ilang. “Tuwirin ninyo ang landas ng Panginoon” ’ Isa 40:3 katulad ng sinabi ni Isaias na propeta.”24 Sila na mga isinugo ay nagmula sa mga Fariseo.25 Siya ay tinanong nila at sinabi sa kaniya, “Kung gayon, bakit ka nagbabawtismo yamang hindi ikaw ang Cristo, ni si Elias, ni ang propeta?”26 Sumagot si Juan sa kanila na sinasabi, “Ako ay nagbabawtismo sa tubig, ngunit may isang nakatayo sa inyong kalagitnaan na hindi ninyo kinikilala.27 Siya ang pumaparitong kasunod ko na higit kaysa sa akin. Hindi ako karapat-dapat na magkalag ng panali ng kaniyang pangyapak.”28 Ang mga bagay na ito ay nangyari sa Betabara, sa ibayo ng Jordan na pinagbabawtismuhan ni Juan.29 Kinabukasan nang nakita ni Juan si Jesus na papalapit sa kaniya, sinabi niya, “Narito ang Kordero ng Diyos na nag-aalis ng kasalanan ng sangkatauhan!30 Siya ang aking tinutukoy, ‘Ang paparitong kasunod ko ay isang lalaking higit kaysa sa akin sapagkat siya ay una sa akin.’31 Hindi ko siya kilala, ngunit ako ay naparitong nagbabawtismo sa tubig upang maihayag siya sa Israel.”32 Nagpatotoo si Juan na nagsasabi, “Nakita ko ang Espiritu na bumabang buhat sa langit katulad ng kalapati, at ito ay nananahan sa kaniya.33 Hindi ko siya kilala, ngunit ang nagsugo sa akin upang magbawtismo sa tubig, siya rin ang nagsabi sa akin, ‘Kung kanino mo makikitang bumababa at nananahan ang Espiritu, siya ang magbabawtismo sa inyo sa Banal na Espiritu.’34 Aking nakita at pinatotohanan na siya ang Anak ng Diyos.”35 Kinabukasan, si Juan ay muling tumayo roon kasama ang dalawa sa kaniyang mga alagad.36 Pagtingin niya kay Jesus na naglalakad, sinabi niya, “Narito ang Kordero ng Diyos!”37 Narinig ng dalawang alagad nang siya ay nagsalita kaya sumunod sila kay Jesus.38 Paglingon ni Jesus at nakita niyang sumusunod sila, sinabi niya sa kanila, “Ano ang inyong hinahanap?” Sinabi nila sa kaniya, “Rabbi,” (ang ibig sabihin ay Guro) “saan ka nakatira?”39 Sinabi niya sa kanila, “Halikayo at inyong tingnan.” Sila ay pumaroon at nakita nila ang kaniyang tinitirahan. Nanatili silang kasama niya nang araw na iyon, noon ay mag-ikasampu na ang oras.40 Ang isa sa dalawang nakarinig kay Juan at sumunod kay Jesus ay si Andres na kapatid ni Simon Pedro.41 Una niyang hinanap ang kaniyang sariling kapatid na si Simon at sinabi sa kaniya, “Natagpuan namin ang Mesiyas” (na ang kahulugan ay Cristo).42 Isinama ni Andres si Simon kay Jesus. Tiningnan siya ni Jesus at sinabi, “Ikaw ay si Simon na anak ni Jonas, tatawagin kang Cefas” (na ang ibig sabihin ay bato).43 Kinabukasan ay ninais ni Jesus na pumunta sa Galilea. Natagpuan niya si Felipe at sinabi sa kaniya, “Sumunod ka sa akin.”44 Si Felipe ay taga-Betsaida na lungsod nina Andres at Pedro.45 Natagpuan ni Felipe si Natanael at sinabi sa kaniya, “Siya na isinulat ni Moises sa Kautusan at ng mga Propeta ay nasumpungan namin. Siya ay si Jesus na taga-Nazaret, ang anak ni Jose.”46 At sinabi ni Natanael sa kaniya, “May mabuti bang bagay na magmumula sa Nazaret?” Sinabi sa kaniya ni Felipe, “Halika at tingnan mo.”47 Nakita ni Jesus si Natanael na papalapit sa kaniya, sinabi niya ang patungkol kay Natanael, “Narito, ang totoong taga-Israel na sa kaniya ay walang pandaraya.”48 Sinabi sa kaniya ni Natanael, “Papaano mo ako nakilala?” Sumagot si Jesus at sinabi sa kaniya, “Bago ka pa tawagin ni Felipe ay nakita na kita nang ikaw ay nasa ilalim ng puno ng igos.”49 Sumagot si Natanael at sinabi sa kaniya, “Rabbi, ikaw ang Anak ng Diyos! Ikaw ang Hari ng Israel!”50 Sumagot si Jesus sa kaniya at sinabi, “Sumasampalataya ka ba dahil sinabi kong ‘Nakita kita sa ilalim ng puno ng igos’? Makikita mo ang mga bagay na higit na dakila kaysa sa mga ito.”51 At sinabi ni Jesus sa kaniya, “Katotohanan, katotohanang sinasabi ko sa inyo, mula ngayon ay makikita ninyong bukas ang langit. Makikita ninyo ang mga anghel ng Diyos ay pumapaitaas at bumababa sa Anak ng Tao.”
Mark 1
1 Ito ang simula ng ebanghelyo patungkol kay Jesu-Cristo, ang Anak ng Diyos2 tulad ng nasusulat sa aklat ng mga propeta, “Narito, isinusugo ko ang aking sugo na nauuna sa iyo. Siya ang maghahanda ng iyong daraanan sa unahan mo.” Mal 3:13 “May tinig ng isang sumisigaw sa ilang, ‘Ihanda ninyo ang daan ng Panginoon. Tuwirin ninyo ang kaniyang mga landas.’ ” Isa 40:34 Si Juan na tagapagbawtismo ay dumating sa ilang upang ipangaral ang bawtismo ng pagsisisi dahil sa kapatawaran ng mga kasalanan.5 At pumunta sa kaniya ang lahat ng mga nasa lalawigan ng Judea at lahat ng mga taga-Jerusalem. At silang lahat ay nagpabawtismo sa kaniya sa ilog Jordan, na ipinahahayag ang kanilang mga kasalanan.6 At nakadamit si Juan ng kasuotang yari sa balahibo ng kamelyo at sa baywang niya ay may pamigkis na balat ng hayop. Ang kaniyang kinakain ay mga balang at pulut-pukyutan.7 At siya ay nangaral na sinasabi, “Ang sumusunod sa hulihan ko ay higit na makapangyarihan kaysa sa akin. Hindi ako karapat-dapat yumukod at magkalag ng tali ng kaniyang mga pangyapak.8 Kayo nga ay binawtismuhan ko sa pamamagitan ng tubig, ngunit kayo ay babawtismuhan niya sa pamamagitan ng Banal na Espiritu.”9 At nangyari sa mga araw na iyon na si Jesus ay dumating mula sa Nazaret ng Galilea at binawtismuhan siya ni Juan sa ilog ng Jordan.10 At nang umaahon si Jesus mula sa tubig ay kaagad niyang nakita na nabuksan ang kalangitan at ang Espiritu na katulad ng kalapati ay bumababa sa kaniya.11 May tinig na nagmula sa langit na nagsasabi, “Ikaw ang pinakamamahal kong Anak na lubos kong kinalulugdan.”12 At kaagad siyang dinala ng Espiritu sa ilang.13 Apatnapung araw siyang nanatili sa ilang at doon siya ay tinukso ni Satanas, at ang kasama niya roon ay mababangis na hayop. At pinaglingkuran siya ng mga anghel.14 Nang naipabilanggo si Juan, pumunta si Jesus sa Galilea na ipinangangaral ang ebanghelyo ng paghahari ng Diyos.15 Sinasabi niya, “Naganap na ang takdang panahon at malapit na ang paghahari ng Diyos. Magsisi kayo at sampalatayanan ninyo ang ebanghelyo.”16 Habang naglalakad si Jesus sa tabi ng lawa ng Galilea, nakita niya si Simon at ang kapatid niyang si Andres na naghahagis ng lambat sa lawa sapagkat sila ay mga mangingisda.17 Sinabi ni Jesus sa kanila, “Sumunod kayo sa akin at gagawin ko kayong mga mamamalakaya ng mga tao.”18 Kaya kaagad nilang iniwan ang kanilang mga lambat at sumunod sa kaniya.19 Nang siya ay malayu-layo na, nakita niya si Santiago na anak ni Zebedeo at ang kapatid niyang si Juan. Sila ay nasa bangka na naghahayuma ng kanilang mga lambat.20 At kaagad silang tinawag ni Jesus. Kaya iniwan nila sa bangka ang kanilang amang si Zebedeo na kasama ang mga upahang manggagawa, at sila ay sumunod na kaniya.21 Pagdating nila sa Capernaum, kaagad pumasok si Jesus sa sinagoga sa araw ng Sabat at siya ay nagturo.22 Sila ay nanggilalas sa kaniyang katuruan sapagkat sila ay tinuturuan niya katulad ng isang may kapamahalaan at hindi katulad ng mga eskriba.23 Sa kanilang sinagoga ay may sumisigaw na lalaking inaalihan ng karumal-dumal na espiritu24 na nagsasabi, “Hayaan mo kami! Ano ito sa iyo at sa amin, Jesus na taga-Nazaret? Naparito ka ba upang kami ay puksain? Kilala namin kung sino ka, ikaw ang Banal ng Diyos.”25 Sinaway siya ni Jesus na sinasabi, “Tumahimik ka at lumabas sa kaniya!”26 Matapos siyang pangisayin ng karumal-dumal na espiritu at pasigawin na may malakas na tinig, ito ay lumabas mula sa kaniya.27 Silang lahat ay namangha kaya sila ay nagtanungan sa isa't isa na sinasabi, “Anong bagay ba ito? Anong bagong katuruan ito na kahit ang mga karumal-dumal na espiritu ay inuutusan niyang may kapamahalaan at sumusunod sila sa kaniya?”28 Kaya kumalat kaagad ang balita patungkol sa kaniya sa buong palibot ng Galilea.29 At pagkaalis nila sa sinagoga, sila ay pumunta kaagad sa bahay nina Simon at Andres kasama sina Santiago at Juan.30 Ang babaing biyenan ni Simon ay nakaratay dahil siya ay nilalagnat kaya kaagad nilang sinabi kay Jesus ang patungkol sa kaniya.31 Nilapitan siya ni Jesus at hinawakan ang kaniyang kamay at ibinangon, at nawala kaagad ang kaniyang lagnat at naglingkod siya sa kanila.32 At sa pagsapit ng takipsilim, nang lumubog ang araw, dinala nila kay Jesus ang lahat ng mga maysakit at ang mga inaalihan ng mga demonyo,33 at ang buong lungsod ay nagkatipon sa may pintuan.34 Marami siyang pinagaling na may iba't ibang sakit at nagpalayas siya ng maraming demonyo at hindi niya pinayagang magsalita ang mga demonyo sapagkat kilala nila kung sino siya.35 Kinaumagahan habang madilim pa, si Jesus ay bumangon at lumabas at pumunta siya sa liblib na lugar at doon ay nanalangin siya.36 Hinanap siya ni Simon at ng kaniyang mga kasama,37 at nang siya ay natagpuan nila, sinabi nila sa kaniya, “Hinahanap ka ng lahat.”38 Sinabi niya sa kanila, “Tayo na sa mga karatig-bayan upang makapangaral din ako roon sapagkat iyan ang layunin ng aking pagparito.”39 Kaya si Jesus ay nangaral sa buong Galilea sa kanilang mga sinagoga at nagpalayas ng mga demonyo.40 May ketonging lumapit kay Jesus na namamanhik at naninikluhod, at sinabi sa kaniya, “Kung nais mo, malilinis mo ako!”41 Nahabag si Jesus, iniabot ang kaniyang kamay at hinawakan ang ketongin na sinasabi, “Ibig ko, maging malinis ka.”42 Pagkasabi nito sa kaniya ni Jesus, nawala kaagad ang ketong at luminis siya.43 Kaya mahigpit siyang binilinan ni Jesus at pinaalis kaagad44 na sinasabi sa kaniya, “Ingatan mong huwag sasabihin kaninuman ang nangyaring ito, sa halip ay humayo ka mismo at magpakita ka sa saserdote. Magdala ka ng handog para sa iyong pagkalinis ayon sa iniutos ni Moises bilang patotoo sa kanila.”45 Ngunit nang siya ay lumabas, sinimulan niyang ipinamalita at ipinangalat sa marami ang nangyari. Dahil dito, hindi na hayagang makapasok sa lungsod si Jesus. Nanatili na lamang siya sa labas na mga liblib na pook, kaya pinuntahan siya ng mga taong nagmula sa iba't ibang dako.
