1 Sapagkat alam natin na kapag ang ating panlupang bahay na toldang ito ay masira, tayo ay mayroong gusaling mula sa Diyos, isang bahay na hindi gawa ng mga kamay, na pangwalang hanggan sa kalangitan.2 At dahil dito, tayo ay dumaraing at nananabik na maibihis sa atin ang ating tahanang mula sa langit.3 At kung tayo nga ay mabihisan, tayo ay hindi na matatagpuang hubad4 sapagkat tayo rin na nasa toldang ito ay dumaraing at nabibigatan hindi dahil ibig nating mahubaran kundi upang mabihisan, nang sa gayon ang may kamatayan ay malamon sa pamamagitan ng buhay.5 Ngunit ang Diyos ang siyang gumawa sa atin para sa mismong bagay na ito, na siya ring nagbigay sa atin ng katiyakan ng Espiritu.6 Kaya tayo ay palaging may lakas ng loob at alam natin na habang tayo ay nananahan sa katawang ito, tayo ay wala sa tahanang mula sa Panginoon7 sapagkat tayo ay namumuhay sa pamamagitan ng pananampalataya at hindi sa pamamagitan ng mga bagay na nakikita.8 Gayunpaman, tayo ay may lakas ng loob at higit na ninanais na mawala mula sa katawan at manahang kasama ng Panginoon.9 Dahil dito, tayo rin ay naghahangad upang maging kaluguran sa kaniya, tayo man ay nananahan sa katawan o wala sa katawan,10 sapagkat tayong lahat ay kailangang tumayo sa harapan ng luklukan ng paghatol ni Cristo upang ang bawat isa ay tatanggap ng mga bagay patungkol sa kaniyang ginawa ukol sa katawan, ito man ay mabuti o masama.11 Kaya dahil alam namin ang pagkatakot sa Panginoon, hinihikayat namin ang mga tao. Ngunit kami ay nahayag sa Diyos at ako ay umaasa na mahayag din sa inyong mga budhi.12 Sapagkat hindi namin ipinapakilalang muli ang aming mga sarili sa inyo, sa halip ay ibinibigay namin sa inyo ang pagkakataong magmalaki dahil sa amin, upang kayo ay magkaroon ng sagot sa kanila na ang pagmamalaki ay panlabas ngunit hindi mula sa puso,13 dahil kung kami ay wala sa aming sarili, iyon ay para sa Diyos at kung kami ay nasa wastong pag-iisip, iyon ay para sa inyo.14 Sapagkat ang pag-ibig ni Cristo ang nag-uudyok sa amin, dahil dito, aming pinagpasyahan na kung may isang namatay para sa lahat, gayundin ang lahat ay namatay.15 At siya ay namatay para sa lahat upang sila na nabubuhay ay hindi na mamuhay sa anumang paraan para sa kanilang sarili, kundi para sa kaniya na namatay at ibinangon alang-alang sa kanila.16 Kung kaya mula ngayon ay wala na kaming nakilalang sinumang tao ayon sa laman. Ngunit kahit nakilala namin si Cristo ayon sa laman, gayunpaman ngayon ay hindi na namin kilala sa ganitong paraan.17 Kaya kung ang sinuman ay na kay Cristo, siya ay bagong nilalang, ang mga dating bagay ay lumipas, narito, ang lahat ng mga bagay ay naging bago.18 At ang lahat ng mga bagay ay mula sa Diyos, na sa pamamagitan ni Jesu-Cristo tayo ay ipinagkasundo niya sa kaniyang sarili at ibinigay niya sa atin ang paglilingkod ng pakikipagkasundo.19 Dahil kung paanong ang Diyos ay na kay Cristo na ipinagkasundo ang sanlibutan sa kaniyang sarili, hindi niya ibinibilang sa kanila ang kanilang mga pagsalangsang at ipinagkatiwala niya sa atin ang salita ng pakikipagkasundo.20 Ngayon, kami ay mga kinatawan para kay Cristo, kung paanong ang Diyos ay sumasamo sa inyo sa pamamagitan namin, kami ay namamanhik na kayo ay makipagkasundo sa Diyos sa pamamagitan ni Cristo21 sapagkat siya na hindi nagkasala ay ginawang kasalanan alang-alang sa atin upang sa pamamagitan niya, tayo ay maging katuwiran ng Diyos.
Colossians 3
1 Kaya kung kayo ay ibinangon na kasama ni Cristo, hanapin ninyo ang mga bagay na nasa itaas, kung saan si Cristo ay nakaupo sa bahaging kanan ng Diyos.2 Ituon ninyo ang inyong pag-iisip sa mga bagay na nasa itaas at hindi sa mga bagay na nasa lupa3 sapagkat kayo ay namatay na at ang buhay ninyo ay itinago na kasama ni Cristo sa Diyos.4 Kapag si Cristo na ating buhay ay mahayag, gayundin naman kayo ay mahahayag na kasama niya sa kaluwalhatian.5 Kaya patayin ninyo ang inyong mga bahagi na makalupa, ito ay ang pakikiapid, karumihan, pita ng laman, masamang-nasa at kasakiman na siyang pagsamba sa diyos-diyosan.6 Dahil sa mga bagay na ito ay dumarating ang poot ng Diyos sa mga anak ng pagsuway,7 kung saan ay minsan din naman kayong lumakad nang kayo ay namumuhay sa ganitong mga bagay.8 Ngunit ngayon ay hubarin din ninyo ang lahat ng mga ito: poot, labis na galit, kasamaan, paglapastangan, malalaswang salita na mula sa inyong bibig.9 Huwag kayong magsinungaling sa isa't isa, yamang hinubad na ninyo ang dating pagkatao kasama ang mga gawain nito.10 At isuot ninyo ang bagong pagkatao na binago sa kaalaman ayon sa wangis niya na lumikha sa kaniya,11 kung saan ay wala ng pagkakaiba ang Griyego at Judio, ang pagtutuli at hindi pagtutuli, ang barbaro, Scita, alipin o malaya, sa halip ay si Cristo ang lahat at nasa lahat.12 Kaya, bilang mga pinili ng Diyos, mga banal at minamahal, isuot ninyo ang kalooban na mahabagin, kabutihan, kapakumbabaan, kaamuan at pagtitiis.13 Magbatahan kayo sa isa't isa at magpatawaran kayo sa isa't isa, kapag ang sinuman ay mayroong hinaing laban sa kaninuman, kung paanong kayo ay pinatawad ni Cristo, gayundin kayo magpatawad.14 Ngunit higit sa lahat ng mga bagay na ito, isuot ninyo ang pag-ibig na siyang bigkis ng pagiging-ganap.15 At hayaan ninyong maghari ang kapayapaan ng Diyos sa inyong mga puso, kung saan kayo ay tinawag din sa isang katawan, kaya kayo ay maging mapagpasalamat.16 Hayaan ninyo na ang salita ni Cristo ay manahan sa inyo nang may kasaganaan sa lahat ng karunungan, sa pagtuturo at sa pagpapaalala sa bawat isa sa mga salmo, sa mga himno at sa mga awiting espirituwal. Umawit kayong may biyaya sa inyong puso sa Panginoon.17 At anuman ang inyong mga gagawin, sa salita o sa gawa, gawin ninyo ang lahat sa pangalan ng Panginoong Jesus, na nagpapasalamat sa Diyos at Ama sa pamamagitan niya.18 Mga asawang babae, magpasakop kayo sa inyong mga asawa sa paraang karapat-dapat sa Panginoon.19 Mga asawang lalaki, ibigin ninyo ang inyong mga asawa at huwag sumama ang inyong loob sa kanila.20 Mga anak, sundin ninyo ang inyong mga magulang sa lahat ng mga bagay sapagkat ito ay nakakalugod sa Panginoon.21 Mga ama, huwag ninyong ibunsod sa galit ang inyong mga anak upang hindi sila panghinaan ng loob.22 Mga alipin, sundin ninyo sa lahat ng mga bagay ang inyong mga panginoon ayon sa laman, hindi sa paglilingkod kung may nakatingin kagaya ng mga mapagbigay-lugod sa tao, kundi sa katapatan ng puso na may takot sa Diyos.23 At anuman ang inyong mga gagawin, gawin ninyo nang buong puso na para sa Panginoon at hindi para sa mga tao,24 yamang nalalaman ninyo na kayo ay tatanggap ng gantimpala ng pamana mula sa Panginoon dahil ang inyong pinaglilingkuran ay ang Cristong Panginoon.25 Ngunit siya na gumagawa ng masama ay tatanggap ng kabayaran sa kasamaang ginawa niya sapagkat walang itinatangi ang Diyos.
