Sa huling hapunan

John 13

1 Bago dumating ang Pista ng Paglagpas, alam ni Jesus na ang kaniyang oras ay dumating na upang siya ay lumisan sa sanlibutang ito patungo sa Ama. Inibig niya ang mga sa kaniya na nasa sanlibutang ito, sila ay inibig niya hanggang sa wakas.2 At nang natapos ang hapunan ay inilagay na nga ng diyablo sa puso ni Judas, ang taga-Keriot na anak ni Simon, na ipagkanulo si Jesus.3 Alam ni Jesus na ibinigay na ng Ama ang lahat ng mga bagay sa kaniyang mga kamay. Siya ay galing sa Diyos at babalik sa Diyos.4 Siya ay tumindig mula sa hapunan at itinabi ang kaniyang mga kasuotan at kumuha siya ng tuwalya at binigkisan ang kaniyang sarili.5 Pagkatapos ay nagbuhos siya ng tubig sa palanggana at nagsimulang hugasan ang mga paa ng mga alagad at punasan ng tuwalyang nakabigkis sa kaniya.6 Nang lumapit siya kay Simon Pedro at sinabi ni Pedro, “Panginoon, huhugasan mo ba ang aking mga paa?”7 Sumagot si Jesus at sinabi sa kaniya, “Ang aking ginagawa ay hindi mo nauunawaan sa ngayon, ngunit malalaman mo pagkatapos ng mga ito.”8 Sinabi ni Pedro sa kaniya, “Kailanman ay hindi mo huhugasan ang aking mga paa.” Sumagot si Jesus sa kaniya, “Kung hindi kita huhugasan, wala kang bahagi sa akin.”9 Sinabi ni Simon Pedro sa kaniya, “Panginoon, hindi lamang ang aking mga paa kundi gayundin ang aking mga kamay at ulo.”10 Sinabi ni Jesus sa kaniya, “Ang napaliguan na ay hindi na kailangang hugasan maliban sa kaniyang mga paa. Ngunit siya ay lubos nang malinis. Kayo ay malinis na bagaman hindi ang lahat.”11 Alam niya kung sino ang magkakanulo sa kaniya kaya sinabi niya, “Hindi ang lahat sa inyo ay malinis.”12 Pagkatapos niyang hugasan ang kanilang mga paa, kinuha niya ang kaniyang mga kasuotan, muli siyang umupo at sinabi niya sa kanila, “Nalalaman ba ninyo kung ano ang ginawa ko sa inyo?13 Tinatawag ninyo akong Guro at Panginoon. Tama ang sinasabi ninyo sapagkat ako nga.14 Yamang ako na inyong Panginoon at Guro ay naghugas ng inyong mga paa, dapat din nga ninyong hugasan ang mga paa ng isa't isa.15 Binigyan ko kayo ng halimbawa upang inyong gawin ang katulad ng ginawa ko sa inyo.16 Katotohanan, katotohanang sinasabi ko sa inyo, ang alipin ay hindi higit na dakila kaysa sa kaniyang panginoon, ni ang sugo ay hindi higit na dakila kaysa sa nagsugo sa kaniya.17 Kung alam na ninyo ang mga bagay na ito ay pinagpala kayo kung gagawin ninyo ang mga ito.18 “Hindi ako nagsasalita patungkol sa inyong lahat. Kilala ko ang aking mga hinirang, ngunit upang matupad ang Kasulatan, ‘Ang kumakain ng tinapay na kasama ko ang siyang nagtaas ng kaniyang sakong laban sa akin.’ Awi 41:919 Ngayon ay sinasabi ko sa inyo bago ito dumating, upang kung ito ay darating, kayo ay sasampalataya na ako iyon.20 Katotohanan, katotohanang sinasabi ko sa inyo, siya na tumatanggap sa sinumang isusugo ko ay tumatanggap sa akin, at siya na tumatanggap sa akin ay tumatanggap sa kaniya na nagsugo sa akin.”21 Pagkasabi ni Jesus ng mga bagay na ito, nabalisa siya sa espiritu. Siya ay nagpatotoo at nagsabi, “Katotohanan, katotohanang sinasabi ko sa inyo, isa sa inyo ang magkakanulo sa akin.”22 Kaya nagtinginan ang mga alagad sa isa't isa na naguguluhan kung sino ang tinutukoy niya.23 Mayroon ngang nakasandal sa dibdib ni Jesus na isa sa kaniyang mga alagad, siya ang iniibig ni Jesus.24 Hinudyatan siya ni Simon Pedro upang tanungin si Jesus kung sino ang kaniyang tinutukoy.25 Sa pagsandal niya sa dibdib ni Jesus, sinabi niya, “Panginoon, sino siya?”26 Sumagot si Jesus, “Siya ang bibigyan ko ng isang subo ng tinapay pagkatapos ko itong maisawsaw.” Nang naisawsaw niya ang isang subo ng tinapay, ibinigay niya iyon kay Judas na taga-Keriot na anak ni Simon.27 Pagkatapos ng isang subo ng tinapay, pumasok sa kaniya si Satanas. Sinabi nga ni Jesus sa kaniya, “Kung ano ang iyong gagawin ay gawin mo kaagad.”28 Walang sinuman sa mga nakaupo sa hapag ang nakakaunawa kung bakit niya iyon sinabi sa kaniya29 dahil inakala ng ilan sa kanila na yamang si Judas ang may hawak ng supot ng salapi ay sinabi ni Jesus sa kaniya, “Bumili ka ng mga kakailanganin natin para sa kapistahan,” o para sa mga dukha upang mayroon siyang maibigay.30 Kaya pagkatanggap niya ng isang subo ay umalis siya kaagad, at noon ay gabi na.31 Kaya nga, nang nakaalis na siya, sinabi ni Jesus, “Ngayon ay naluwalhati ang Anak ng Tao at ang Diyos ay naluwalhati sa kaniya.32 Kung ang Diyos ay naluwalhati sa kaniya, luluwalhatiin din siya ng Diyos sa kaniyang sarili. At siya ay kaagad niyang luluwalhatiin.33 Munting mga anak, makakasama ninyo ako nang kaunting panahon na lamang at hahanapin ninyo ako. At kagaya ng sinabi ko sa mga Judio, ‘kung saan ako pupunta ay hindi ninyo magagawang pumunta.’ Ngayon ganito rin ang sinasabi ko sa inyo.34 Isang bagong utos ang ibinibigay ko sa inyo na mag-ibigan kayo sa isa't isa. Kung paanong inibig ko kayo, mag-ibigan din kayo sa isa't isa.35 Sa pamamagitan nito ay malalaman ng lahat ng mga tao na kayo ay aking mga alagad kung nagtataglay kayo ng pag-ibig sa isa't isa.”36 Sinabi ni Simon Pedro sa kaniya, “Panginoon, saan ka pupunta?” Sumagot si Jesus sa kaniya, “Sa ngayon, sa pupuntahan ko ay hindi ka makakasunod sa akin, ngunit susunod ka sa akin pagkatapos.”37 Sinabi ni Pedro sa kaniya, “Panginoon, bakit hindi ako makakasunod sa iyo ngayon? Iaalay ko ang aking buhay alang-alang sa iyong kapakanan.”38 Sumagot si Jesus sa kaniya, “Iaalay mo ang iyong buhay alang-alang sa aking kapakanan? Katotohanan, katotohanang sinasabi ko sa iyo, hindi titilaok ang tandang hanggang sa maipagkaila mo ako nang tatlong ulit.