Tuleva tuho

Revelation 8

1 At nang binuksan ng Kordero ang ikapitong selyo, nagkaroon ng katahimikan sa langit ng halos kalahating oras. 2 At nakita ko ang pitong anghel na nakatayo sa harapan ng Diyos at ibinigay sa kanila ang pitong trumpeta. 3 At isa pang anghel ang dumating at pinatayo sa dambana. Siya ay may taglay na gintong sunugan ng insenso at ibinigay sa kaniya ang maraming insenso upang ito ay ihandog niya sa ibabaw ng gintong dambana na nasa harapan ng trono kasama sa mga panalangin ng lahat ng mga banal. 4 At pumaitaas ang usok ng mga insenso mula sa kamay ng anghel sa harapan ng Diyos kasama sa mga panalangin ng mga banal. 5 At kinuha ng anghel ang sunugan ng insenso at ito ay pinuno niya ng apoy mula sa dambana at inihagis ito sa lupa at nagkaroon ng mga ingay at mga kulog at mga kidlat at lindol. 6 At ang pitong anghel na nagtataglay ng pitong trumpeta ay inihanda ang kanilang mga sarili upang kanilang patunugin ang mga trumpeta. 7 At pinatunog ng unang anghel ang trumpeta at nagkaroon ng ulan ng yelo at apoy na may kahalong dugo, at ito ay inihagis sa lupa at ang ikatlong bahagi ng mga punongkahoy ay nasunog at ang lahat ng luntiang damo ay nasunog. 8 At pinatunog ng pangalawang anghel ang trumpeta at isang katulad ng malaking bundok na nagliliyab sa apoy ay inihagis sa dagat at ang ikatlong bahagi ng dagat ay naging dugo, 9 at namatay ang ikatlong bahagi ng mga nilalang na may buhay na nasa dagat at ang ikatlong bahagi ng mga barko ay nawasak. 10 At pinatunog ng pangatlong anghel ang trumpeta at nahulog mula sa langit ang isang malaking bituin na nagliliyab katulad ng isang sulo at ito ay nahulog sa ikatlong bahagi ng mga ilog at sa mga bukal ng tubig. 11 At ang pangalan ng bituin ay Kapaitan. At ang ikatlong bahagi ng tubig ay nagiging kapaitan at maraming tao ang namatay dahil sa tubig sapagkat pumait ang mga ito. 12 At pinatunog ng pang-apat na anghel ang trumpeta at napinsala ang ikatlong bahagi ng araw at ang ikatlong bahagi ng buwan at ang ikatlong bahagi ng mga bituin, kung kaya dumilim ang ikatlong bahagi ng mga ito at hindi magliliwanag ang ikatlong bahagi ng araw at gayundin ang gabi. 13 At nakita ko at narinig ko ang isang anghel na lumilipad sa kalagitnaan ng langit na nagsasabi sa pamamagitan ng malakas na tinig, “Kaabahan, kaabahan, kaabahan sa kanila na mga naninirahan sa daigdig dahil sa natitira pang pagtunog ng trumpeta ng tatlong anghel na malapit nang patunugin.”