1 Bago dumating ang Pista ng Paglagpas, alam ni Jesus na ang kaniyang oras ay dumating na upang siya ay lumisan sa sanlibutang ito patungo sa Ama. Inibig niya ang mga sa kaniya na nasa sanlibutang ito, sila ay inibig niya hanggang sa wakas.2 At nang natapos ang hapunan ay inilagay na nga ng diyablo sa puso ni Judas, ang taga-Keriot na anak ni Simon, na ipagkanulo si Jesus.3 Alam ni Jesus na ibinigay na ng Ama ang lahat ng mga bagay sa kaniyang mga kamay. Siya ay galing sa Diyos at babalik sa Diyos.4 Siya ay tumindig mula sa hapunan at itinabi ang kaniyang mga kasuotan at kumuha siya ng tuwalya at binigkisan ang kaniyang sarili.5 Pagkatapos ay nagbuhos siya ng tubig sa palanggana at nagsimulang hugasan ang mga paa ng mga alagad at punasan ng tuwalyang nakabigkis sa kaniya.6 Nang lumapit siya kay Simon Pedro at sinabi ni Pedro, “Panginoon, huhugasan mo ba ang aking mga paa?”7 Sumagot si Jesus at sinabi sa kaniya, “Ang aking ginagawa ay hindi mo nauunawaan sa ngayon, ngunit malalaman mo pagkatapos ng mga ito.”8 Sinabi ni Pedro sa kaniya, “Kailanman ay hindi mo huhugasan ang aking mga paa.” Sumagot si Jesus sa kaniya, “Kung hindi kita huhugasan, wala kang bahagi sa akin.”9 Sinabi ni Simon Pedro sa kaniya, “Panginoon, hindi lamang ang aking mga paa kundi gayundin ang aking mga kamay at ulo.”10 Sinabi ni Jesus sa kaniya, “Ang napaliguan na ay hindi na kailangang hugasan maliban sa kaniyang mga paa. Ngunit siya ay lubos nang malinis. Kayo ay malinis na bagaman hindi ang lahat.”11 Alam niya kung sino ang magkakanulo sa kaniya kaya sinabi niya, “Hindi ang lahat sa inyo ay malinis.”12 Pagkatapos niyang hugasan ang kanilang mga paa, kinuha niya ang kaniyang mga kasuotan, muli siyang umupo at sinabi niya sa kanila, “Nalalaman ba ninyo kung ano ang ginawa ko sa inyo?13 Tinatawag ninyo akong Guro at Panginoon. Tama ang sinasabi ninyo sapagkat ako nga.14 Yamang ako na inyong Panginoon at Guro ay naghugas ng inyong mga paa, dapat din nga ninyong hugasan ang mga paa ng isa't isa.15 Binigyan ko kayo ng halimbawa upang inyong gawin ang katulad ng ginawa ko sa inyo.16 Katotohanan, katotohanang sinasabi ko sa inyo, ang alipin ay hindi higit na dakila kaysa sa kaniyang panginoon, ni ang sugo ay hindi higit na dakila kaysa sa nagsugo sa kaniya.17 Kung alam na ninyo ang mga bagay na ito ay pinagpala kayo kung gagawin ninyo ang mga ito.
Luke 22
7 Ngunit dumating ang araw ng Tinapay na Walang Pampaalsa, kung kailan kinakailangang katayin ang handog para sa Paglagpas.8 Kaya isinugo ni Jesus si Pedro at si Juan, na sinasabi, “Umalis kayo at ihanda ninyo ang hapunan ng Paglagpas para sa atin upang tayo ay makakain.”9 At sinabi nila sa kaniya, “Saan mo ninanais na kami ay makapaghanda?”10 At sinabi niya sa kanila, “Narito, kapag kayo ay makapasok sa lungsod, makakasalubong ninyo ang isang lalaking may dalang banga ng tubig. Sumunod kayo sa kaniya sa bahay na kaniyang papasukan.11 At sasabihin ninyo sa may-ari ng bahay, ‘Ang Guro ay nagsasabi sa iyo, “Saan ang silid-pampanauhin kung saan ako ay maaring kumain ng hapunan ng Paglagpas kasama ng aking mga alagad?” ’12 At ipapakita sa inyo ng lalaking iyon ang isang malaking silid sa itaas na may nakaayos na kagamitan. Maghanda kayo roon.”13 At nang sila ay nakaalis, kanilang natagpuan ito katulad ng kaniyang sinabi sa kanila, at sila ay naghanda ng hapunan ng Paglagpas.14 At nang dumating ang oras, si Jesus ay dumulog sa hapag at ang labindalawang apostol ay kasama niya.15 At sinabi niya sa kanila, “Buong paghahangad kong hinangad na kumain ng hapunang ito ng Paglagpas na kasama kayo bago sa aking paghihirap16 sapagkat sinasabi ko sa inyo na hindi na ako kakain nito kailanman hanggang sa maganap ito sa kaharian ng Diyos.”17 Kaya pagkatanggap niya ng saro, siya ay nagpasalamat at sinabi, “Kunin ninyo ito at paghati-hatian ninyo ito18 sapagkat sinasabi ko sa inyo na hindi na ako iinom mula sa bunga ng ubas kailanman hanggang sa dumating ang kaharian ng Diyos.”19 At pagkakuha niya ng tinapay, siya ay nagpasalamat at pinagputul-putol ito at ibinigay sa kanila na sinasabi, “Ito ang aking katawan na ibinigay alang-alang sa inyo. Gawin ninyo ito sa pag-alaala sa akin.”20 Sa gayunding paraan, kinuha niya ang saro pagkatapos na makapaghapunan, at sinabi, “Ang sarong ito ay ang bagong tipan sa aking dugo na ibinuhos alang-alang sa inyo.21 Subalit, narito, ang kamay niyaong magkakanulo sa akin ay kasama ko sa hapag.22 At tunay na ang Anak ng Tao ay humahayo ayon sa nakatakda na, ngunit kaabahan sa taong iyon na sa pamamagitan niya ay ipagkakanulo ang Anak ng Tao.”23 At sila ay nagsimulang magtanong sa isa't isa kung sino kaya sa kanila ang maaaring gumawa ng bagay na ito.24 At nagkaroon din ng alitan sa kanila kung sino sa kanila ang itinuturing na pinakadakila.25 Ngunit sinabi ni Jesus sa kanila, “Ang mga hari ng mga Gentil ay namumuno na may pagkapanginoon sa kanila at sila na namamahala sa kanila ay tinatawag na ‘tagapagpala.’26 Ngunit huwag kayong maging gayon. Sa halip, siya na pinakadakila sa inyo ay hayaan siyang maging katulad sa nakababata at siya na tagapanguna ay katulad sa kaniya na naglilingkod,27 sapagkat sino nga ba ang higit na dakila, siya ba na nakadulog sa hapag o siya na naglilingkod? Hindi ba siya na nakadulog sa hapag? Ngunit ako, na nasa kalagitnaan ninyo, ay katulad sa kaniya na naglilingkod.28 “At kayo yaong mga nagpapatuloy na kasama ko sa aking mga pagsubok.29 At ako ay nagtatalaga ng kaharian para sa inyo kung paanong ang aking Ama ay nagtalaga para sa akin,30 upang kayo ay makakain at makainom sa aking hapag sa aking kaharian, at upang kayo ay makaupo sa mga trono na hinahatulan ang labindalawang lipi ni Israel.”31 At sinabi ng Panginoon, “Simon, Simon, narito, kayo ay hinihingi ni Satanas na mapasakaniya upang salain katulad ng trigo.32 Subalit ako ay nagsumamo para sa iyo upang huwag manghina ang iyong pananampalataya, at sa iyong panunumbalik, patatagin mo ang iyong mga kapatid.”33 Ngunit sinabi niya sa kaniya, “Panginoon, ako ay nakahanda ring mabilanggo at mamatay kasama mo.”34 Subalit sinabi ni Jesus, “Pedro, sinasabi ko sa iyo, ang tandang ay hinding-hindi titilaok sa araw na ito bago mo ipagkakaila nang tatlong ulit na kilala mo ako.”35 Sinabi rin niya sa kanila, “Nang kayo ay isinugo ko na walang lalagyan ng salapi at mga pangyapak, kinulang ba kayo ng anumang bagay?” At sinabi nila, “Hindi.”36 Kaya sinabi niya sa kanila, “Ngunit ngayon, siya na may lalagyan ng salapi, hayaan siyang dalhin ito gayundin ang kaniyang supot, at siya na wala, hayaang ipagbili niya ang kaniyang damit at bumili ng tabak.37 Sapagkat sinasabi ko sa inyo na itong nasusulat ay kinakailangan pang maganap sa akin, ‘At siya ay ibinilang din sa mga hindi kumikilala sa kautusan’ Isa 53:12 sapagkat ang mga bagay patungkol sa akin ay nagkakaroon na ng kaganapan.”38 At sinabi nila, “Panginoon, Narito, may dalawang tabak dito.” Sinabi niya sa kanila, “Sapat na ito.”39 At nang si Jesus ay lumabas, siya ay pumunta sa bundok ng mga Olibo ayon sa kinaugalian at ang kaniyang mga alagad ay sumunod din sa kaniya.
Mark 14
12 Sa unang araw ng Pista ng Tinapay na Walang Pampaalsa, nang kanilang inihahandog ang kordero ng Paglagpas, sinabi ng kaniyang mga alagad sa kaniya, “Saan mo ibig na kami ay pumunta at kami ay makapaghanda upang makakain ka ng hapunan ng Paglagpas?”13 Kaya isinugo niya ang dalawa sa kaniyang mga alagad at sinabi niya sa kanila, “Pumunta kayo sa lungsod at may masasalubong kayong lalaki na may dalang isang banga ng tubig, sundan ninyo siya.14 Kung saan man siya papasok, sabihin ninyo sa may-ari ng bahay, ‘Sinasabi ng Guro, “Saan ang silid-pampanauhin kung saan ako ay maaring kumain ng hapunan ng Paglagpas kasama ng aking mga alagad?” ’15 At ipapakita niya sa inyo ang malaking silid sa itaas na may nakaayos na kagamitan. Maghanda kayo roon para sa atin.”16 Umalis ang mga alagad at pumasok sa lungsod, at natagpuan nila ang ayon sa sinabi ni Jesus sa kanila at inihanda nila ang hapunan ng Paglagpas.17 At pagsapit ng gabi, si Jesus ay dumating kasama ng labindalawa.18 At habang sila ay nakadulog at kumakain, sinabi ni Jesus, “Katotohanang sinasabi ko sa inyo na ang isa sa inyo na kumakaing kasalo ko ay ipagkakanulo ako.”19 At sila ay nagsimulang malungkot kaya isa-isa silang nagsabi sa kaniya, “Ako ba?” at ang iba ay nagsabi, “Ako ba?”20 Ngunit nang sumagot si Jesus, sinabi niya sa kanila, “Ang isa sa labindalawa, siya na kasabay kong magsawsaw sa mangkok.21 Ang Anak ng Tao nga ay papanaw ayon sa nasusulat patungkol sa kaniya subalit sa aba ng taong iyon na sa pamamagitan niya ay maipagkakanulo ang Anak ng Tao. Mabuti pa sa taong iyon kung hindi siya naipanganak.”22 Habang sila ay kumakain, si Jesus ay kumuha ng tinapay, at nang siya ay nakapagpasalamat, pinagputul-putol niya ito at ibinigay sa kanila at sinabi, “Kunin ninyo. Kainin ninyo. Ito ay aking katawan.”23 At pagkatapos ay kinuha niya ang saro, at nang siya ay nakapagpasalamat, ibinigay niya ito sa kanila at lahat sila ay uminom mula sa saro.24 At sinabi niya sa kanila, “Ito ang aking dugo ng bagong tipan na ibinuhos para sa marami.25 Katotohanang sinasabi ko sa inyo, kailanman ay hindi na ako iinom mula sa bunga ng ubas hanggang sa araw na iyon na kung kailan ay maiinom ko ang bago nito sa kaharian ng Diyos.”26 Pagkaawit nila ng isang himno, sila ay pumunta sa bundok ng mga Olibo.
Matthew 26
17 Sa simula ng kapistahan ng Tinapay na Walang Pampaalsa, ang mga alagad ay pumunta kay Jesus na sinasabi, “Saan mo ninanais na kami ay maghanda para sa iyo upang kumain sa Paglagpas?”18 At sinabi niya, “Pumunta kayo sa isang lalaki na nasa lungsod at sabihin ninyo sa kaniya, ‘Ang Guro ay nagsabi, “Ang aking nakatakdang oras ay malapit na. Gaganapin ko ang Paglagpas, kasama ang aking mga alagad, sa inyo.” ’ ”19 Kaya ginawa ng mga alagad ang ayon sa iniutos ni Jesus sa kanila at inihanda nila ang Paglagpas.20 Nang nagtakipsilim na, si Jesus ay dumulog sa hapag kasama ang labindalawa.21 At habang sila ay kumakain, sinabi niya sa kanila, “Katotohanang sinasabi ko sa inyo na isa sa inyo ang magkakanulo sa akin.”22 At sila ay labis na namighati at ang bawat isa sa kanila ay nagsimulang magsabi sa kaniya, “Panginoon ako ba?”23 Siya ay sumagot at sinabi, “Siya na magsawsaw ng kamay sa mangkok kasabay ko, siya ang magkakanulo sa akin.24 Ang Anak ng Tao nga ay humahayo ayon sa nakasulat patungkol sa kaniya. Ngunit sa aba ng taong iyon na sa pamamagitan niya ay ipinagkakanulo ang Anak ng Tao. Mabuti pa sa taong iyon kung hindi na siya ipinanganak.”25 At sumagot si Judas, siya na nagkakanulo kay Jesus, “Rabbi, ako ba?” Sinabi niya sa kaniya, “Ikaw ang nagsabi.”26 At habang sila ay kumakain, kinuha ni Jesus ang tinapay, pinagpala niya ito at pinagputul-putol at ibinigay sa kaniyang mga alagad. At sinabi niya, “Kunin ninyo at kainin ninyo, ito ang aking katawan.”27 At kinuha niya ang saro at nagpasalamat at ibinigay niya ito sa kanila na sinasabi, “Uminom kayong lahat28 sapagkat ito ang aking dugo ng bagong tipan na nabubuhos para sa kapatawaran ng mga kasalanan ng marami.29 Ngunit sinasabi ko sa inyo na hinding-hindi ako iinom ng katas ng ubas na ito mula ngayon hanggang sa araw na mainom ko itong panibago na kasama kayo sa kaharian ng aking Ama.”30 At pagkaawit nila ng isang himno, sila ay umalis patungo sa bundok ng mga Olibo.
