1 Nangyari, habang si Apollos ay nasa Corinto, si Pablo ay dumaan sa mga liblib na dako at dumating sa Efeso. At nang natagpuan niya ang ilang alagad,2 sinabi niya sa kanila, “Tinanggap ba ninyo ang Banal na Espiritu nang kayo ay sumampalataya?” Ngunit sinabi nila sa kaniya, “Hindi man lang namin narinig kung may Banal na Espiritu.”3 At sinabi niya sa kanila, “Sa ano nga kayo binawtismuhan?” Kaya sinabi nila, “Sa bawtismo ni Juan.”4 Subalit sinabi ni Pablo, “Nagbawtismo nga si Juan ng bawtismo ng pagsisisi na nagsasabi sa mga tao na sila ay dapat sumampalataya sa kaniya na dumarating na kasunod niya, samakatuwid ay kay Cristo Jesus.”5 At nang narinig nila ito, sila ay nabawtismuhan sa pangalan ng Panginoong Jesus.6 At nang ipinatong ni Pablo ang kaniyang mga kamay sa kanila, ang Banal na Espiritu ay bumaba sa kanila at sila ay nagsalita ng mga wika at nagpahayag.7 Ang lahat ng mga lalaki ay humigit-kumulang sa labindalawa.8 At siya ay pumasok sa sinagoga at nagsalita ng may katapangan sa loob ng tatlong buwan na ipinapaliwanag at nanghihikayat patungkol sa mga bagay ng paghahari ng Diyos.9 Ngunit nang ang ilang nagmatigas at hindi sumampalataya ay nagsasalita ng masama sa Daan sa harap ng maraming tao, siya ay umalis sa kanila at humiwalay sa mga alagad. At siya ay araw-araw na nakipagpaliwanagan sa paaralan ng isang Tirano.10 At ito ay nagpatuloy sa loob ng dalawang taon, kaya ang lahat ng mga naninirahan sa Asya ay nakarinig ng salita ng Panginoong Jesus, kapwa mga Judio at mga Griyego.11 At ang Diyos ay gumawa ng mga hindi pangkaraniwang mga makapangyarihang gawa sa pamamagitan ng mga kamay ni Pablo.12 Kaya kahit ang mga panyo, o mga tapis na mula sa kaniyang katawan ay dinadala sa mga may karamdaman, at sila ay gumaling sa kanilang mga karamdaman, at ang mga masasamang espiritu ay lumalabas mula sa kanila.13 Ngunit ang ilan sa mga Judiong pagala-gala, na nagpapalayas ng mga masasamang espiritu, ang bumigkas ng pangalan ng Panginoong Jesus sa mga sinasapian ng masamang espiritu, na sinasabi, “Inuutusan namin kayo sa pamamagitan ni Jesus na siyang ipinangangaral ni Pablo.”14 At may pitong anak na lalaki si Esceva, na isang Judio at pinakapunong saserdote, ang siyang gumagawa nito.15 Ngunit sumagot ang masamang espiritu at sinabi, “Si Jesus ay kilala ko at si Pablo ay nakikilala ko. Ngunit sino kayo?”16 At nagtatatalon sa kanila ang lalaking kinaroroonan ng masamang espiritu at nilupig sila at nanaig laban sa kanila, kaya sila ay tumakas na hubad at mga sugatan mula sa bahay na iyon.17 At nangyari na ito ay nalaman ng lahat ng mga Judio, gayundin ng mga Griyego na naninirahan sa Efeso, at ang pagkatakot ay bumalot sa kanilang lahat at patuloy na nadakila ang pangalan ng Panginoong Jesus.18 Marami rin sa mga nanampalataya ang dumating na naghahayag at nagsasalaysay ng kanilang mga gawa.19 At marami sa mga gumagawa ng salamangka ang sama-samang nagdala ng kanilang mga aklat at pinagsusunog nila ang mga ito sa paningin ng lahat. At binilang nila ang halaga ng mga iyon at nalaman na iyon ay nasa limampung libong putol na pilak.20 Sa gayong paraan, may kapangyarihang lumago at nanaig ang salita ng Panginoon.21 At pagkatapos naganap ang mga bagay na ito, binalak ni Pablo, sa espiritu, na pumunta sa Jerusalem pagkatapos niyang dumaan sa Macedonia at Acaya, kaniyang sinabi, “Pagkagaling ko roon, kinakailangang makita ko rin ang Roma.”22 Kaya isinugo niya sa Macedonia ang dalawang naglilingkod sa kaniya, sina Timoteo at Erasto, ngunit siya ay nanatili nang ilang panahon sa Asya.23 At sa panahong iyon ay may naganap na hindi maliit na kaguluhan patungkol sa Daan24 sapagkat may isang lalaking panday-pilak na ang pangalan ay Demetrio, na gumagawa ng mga dambanang pilak ni Artemis, ang nakakapagbigay ng hindi maliit na kita sa mga manggagawa.25 Nang sila ay natipon niya, gayundin ang mga manggagawa ng gayong hanapbuhay, sinabi niya, “Mga ginoo, nalalaman ninyo na ang ating kayamanan ay sa hanapbuhay na ito.26 Nakikita rin ninyo at naririnig na hindi lamang sa Efeso kundi halos sa buong Asya, na hinimok nitong si Pablo at inilihis ang maraming tao sa pamamagitan ng pagsasabi na hindi mga diyos yaong mga ginagawa sa pamamagitan ng mga kamay.27 At hindi lamang nanganganib na mawalan ng kabuluhan ang hanapbuhay nating ito, kundi maging ang templo ng dakilang diyosang si Artemis, na siyang sinasamba ng buong lalawigan ng Asya at ng sanlibutan, ay maituring na maging walang halaga at maibagsak ang kaniyang kadakilaan.”28 At pagkatapos nilang narinig ito, sila ay napuno ng galit at sumigaw na sinasabi, “Dakila ang Artemis ng mga taga-Efeso.”29 At napuno ng kalituhan ang buong lungsod at nagkaisa silang lumusob sa dulaan at sinunggaban nila sina Gayo at Aristarco, na mga taga-Macedonia at mga kasama ni Pablo sa paglalakbay.30 Ngunit kahit ninanais pumasok ni Pablo sa madla, hindi siya pinahintulutan ng mga alagad.31 At ang ilan naman sa mga pinuno ng Asya na mga kaibigan niya ay nagsugo sa kaniya at nagsusumamong huwag niyang ipakipagsapalaran ang kaniyang sarili sa dulaan.32 Kaya nga, ang ilan ay sumisigaw ng isang bagay at ang ilan ay iba naman dahil ang kapulungan ay nalito na at hindi alam ng nakararami kung bakit sila ay nagkatipon.33 At inilabas nila si Alejandro mula sa napakaraming tao, na ipinagtutulakan ng mga Judio upang pumunta sa harapan. Ngunit inihudyat ni Alejandro ang kaniyang kamay na ibig niyang gumawa ng pagtatanggol sa madla.34 Subalit nang nakilala nila na siya ay isang Judio, sa isang tinig, silang lahat ay sumisigaw nang halos dalawang oras, “Dakila ang Artemis ng mga taga-Efeso!”35 Nang napatahimik na ng kalihim ng bayan ang napakaraming tao, sinabi niya, “Mga ginoong taga-Efeso, sino ang taong hindi nakakaalam na ang lungsod ng mga taga-Efeso ay tagapagsamba ng dakilang diyosang si Artemis at niyaong nahulog mula kay Zeus?36 Kaya yamang hindi maipagkakaila ang mga bagay na ito, nararapat na kayo ay maging mahinahon na at huwag gumawa ng anumang kapusukan37 sapagkat dinala ninyo rito ang mga lalaking ito na hindi mga magnanakaw sa templo, ni mga lumalapastangan sa inyong diyosa.38 Kaya nga, kung si Demetrio at ang mga manggagawa na kasama niya ay nagtataglay ng usapin laban sa kaninuman, ang mga paglilitis ay isinasagawa at may mga gobernador. Hayaan silang isakdal ang isa't isa.39 Subalit kung may pagsasangguni pa kayo patungkol sa ibang mga bagay, ito ay matutugunan sa kapulungan ayon sa batas,40 sapagkat tayo rin ay nanganganib na masakdal patungkol sa kaguluhan sa araw na ito, dahil sa walang anumang dahilan ang maibibigay natin bilang paliwanag sa magulong pagtitipong ito.”41 Pagkasabi niya ng mga bagay na ito, pinauwi niya ang kapulungan.
